Koronavırýstan jazylǵan elordalyq: Ómir súrgim keletinin túsindim
NUR-SULTAN. QazAqparat - Nur-Sultan qalalyq kópbeıindi №1 aýrýhanada koronavırýs indetinen tolyq saýyqqan sońǵy patsıent búgin úıine shyǵaryldy, dep habarlaıdy QazAqparat tilshisi.
«Aýyryp qalǵanymdy bilgen sátte mamandandarǵa júginsem, emdelip shyǵamyn degen úmit boldy. Jasym 53-te, úreıge boı aldyrǵan joqpyn. Jalpy ózimdi jaısyz seziný maýsymnyń 28-i kúni bastalǵan edi. Bastapqy ýaqytta úıde em ala bastadym. Alǵashqyda jótel qysyp, odan keıin denem aýyrsynyp, álsizdik paıda boldy. Sodan keıin ıis sezýden qaldym. Tamyz aıynyń basynda aýrýhanaǵa júgindim», - dedi aýrýhanadan shyqqan elordalyq Baıan Súbhanqulova BAQ ókilderine.
Onyń aıtýynsha, aýrýhanaǵa kelgen kezde kompıýterlik tomografııa jasalyp, ókpesiniń zaqymdanǵany anyqtalǵan.
«Jalpy, men úıden kóp shyǵa bermeımin, otbasymyzben rejımdi saqtaımyz. Alaıda bir jerde vırýsty juqtyryp alǵanym anyq. Aýrýhanaǵa jatqyzylǵan soń emdeý sharalarynyń bárin aldym. Kez kelgen adam ómir súrý úshin jantalasady. Men de ómir súrgim keletindigin túsindim. Aldaǵy ýaqytta mundaı indetpen eshkimniń aýyrmaýyn tileımin. Aǵzam kúshti, maǵan bul vırýs juqpaıdy dep oılaýshy edim. Oıymnyń aǵat ekendigin aýyryp turǵannan keıin túsindim. Aýrý-syrqaýsyz ótkizgen ár kúnim úshin qýanamyn», - dedi ol.
