Koronavırýstan jazylǵan Borıs Djonson búgin jumysyna qaıta kirisedi
NUR-SULTAN. QazAqparat – Ulybrıtanııa Premer-mınıstri Borıs Djonson COVID-19 vırýsynan saýyǵyp, Daýnıng-strıt, 10 mekenjaıyndaǵy rezıdentsııasyna oraldy, dep habarlaıdy QazAqparat DW agenttigine silteme jasap.
27 sáýirde koronavırýs ınfektsııasymen aýyryp shyqqan Ulybrıtanııa premer-mınıstri qaýipti indetpen kúreske jaýapty mınıstrlermen otyrys ótkizedi dep josparlanǵan.
Sky News telearnasynyń habarlaýynsha, 27 sáýirde Úkimet basshysy qaıtadan óz mindetterin oryndaýǵa kirisedi.
Djonson bir apta aýrýhanada jatty, sodan keıin eki apta qala syrtyndaǵy Bakıngemshır grafyndaǵy Chekers rezıdentsııasynda emdeldi.
Worldometer volonterleri halyqaralyq tobynyń derekterinshe, elde 152 840 adam vırýs juqtyrǵan, 20 732 adam qaıtys bolǵan.
Eske sala keteıik, 55 jastaǵy brıtandyq premer naýryz aıynyń sońynda koronavırýs juqtyryp alǵan. Al 5 sáýirde aýrýhanaǵa jatqyzylǵan bolatyn. Kelesi kúni saıasatkerdiń jaǵdaıy nasharlap, qarqyndy terapııaǵa aýystyryldy. 9 sáýirde premer aýrýhanadan shyqty.
