Koronavırýstan jazyla bastaǵan naýqastardy kórgende eńbegimiz esh ketpegenine qýanamyz - dáriger
QARAǴANDY. QazAqparat - Adam ómirine arasha túsip, 24 saǵat 24 mınýttaı zyryldap ótip jatqanda sharshaǵanyń da bilinbeıdi. Koronavırýspen kúresip júrgen dáriger-ınfektsıonıst Baıanbek Aspandııarov osylaı deıdi, dep habarlaıdy QazAqparat Ortalyq Qazaqstan gazetine silteme jasap.
Dáriger-ınfektsıonıst, Qaraǵandy oblystyq klınıkalyq aýrýhanasy ınfektsııa bóliminiń meńgerýshisi Baıanbek Aspandııarov aýrýhanadan shyqpaı jumys istegeli on táýlikke jaqyndapty.
«Kúnniń atqany, keshtiń batqany, tipti, aptanyń qaı kúni ekenin aıyrýdan qalǵaly qashan?! Vırýs juqtyrǵan naýqastardyń janyndaǵy medıtsına qyzmetkerleri úshin mınýt, saǵat, kún, apta uǵymdary joǵalǵandaı. Basty esebimiz – syrqattan jazylýǵa bet alǵandar men jazylyp shyqqandar. Otbasymdy kórmegeli de bir aıdan asypty. Bastapqyda provızorlyq aýrýhanada bolǵandyqtan, zaıybym men eki sábıime aýrý juqtyryp alýdan seskenip, aýylǵa, ata-anama jibergenmin. Qolym qalt etkende habarlasyp, balalarymnyń «áke» degen tátti daýysyn estigende táýlik boıy aýa ótpeıtin arnaıy kıimmen júrgeniń umytylyp, ár naýqas úshin shyrqyraı qınalǵan jan azabyń bir sátte seıilip júre beredi», - deıdi aq halatty abzal jan.
Aıtýynsha, ol ózi úshin de, tipti, naýqastar úshin de qoryqpaıdy. Sebebi, dárigerlerge barlyq jaǵdaı jasalǵan, vırýs juqtyrǵandar da qatań baqylaýda. Tek halyq karantın rejıminiń talabyn saqtamaı, dert juqtyrýshylar qatary arta túspese eken degen oı maza bermeıdi.
«Karantın uzap ketse, otbasymmen qaýyshar kúnniń, balalarymdy baýyryma basyp, meıirim qanǵansha ıiskeıtin sáttiń de alystaı túsetinin oılasam, kóńilim bult torlaǵan aspandaı bolady. Jabyqqan kóńil shirkin jazylýǵa bet alǵan naýqastardy kórgende, kún-tún demeı, jantalasqan eńbegińniń esh ketpegenin sezgende serpilip qalady. Adam ómirine arasha túsip, 24 saǵat 24 mınýttaı zyryldap ótip jatqanda sharshaǵanyń da bilinbeıdi. Táýliktik aýysymnan keıin sál kóz shyrymyn alyp, qaıtadan jumysqa kirisemiz», - dep atap ótti Baıanbek Aspandııarov.
Dárigerdiń sózine sensek, ájesi bala kúninen «dáriger – qurmetti mamandyq» dep qulaǵyna quıyp otyrǵan. Dál qazirgi sátte ol osynaý mamandyqty tańdaǵanyna dán rıza.
«Keıde tipti ata-anammen, jarymmen, balalarymmen habarlasýǵa da múmkindik bolmaı qalady. Olardyń da, búkil qazaq eliniń de tileýimizdi tilep otyrǵanyn ishteı sezemiz. Oraıy túskende «Ortalyq Qazaqstan» gazeti arqyly otbasyma sálem joldasam deımin. Habarlasa almaı jatqan sátterimde olardyń alańdamaýyn ótinemin. Eń bastysy, keler kúnderdiń mamyrajaı bolýy. Al, meniń qazirgi mindetim – kózge kórinbeıtin qaýipti «jaýmen» betpe-bet shaıqasta jeńiske jetý!», - deıdi dáriger.
