Koronavırýstan saqtaný úshin qandaı talaptardy oryndaǵan jón
QYZYLORDA. KAZINFORM - El turǵyndary arasynda koronavırýs ınfektsııasy áli de boı kórsetip otyr. Álemdi jaılaǵan pandemııany kópshilik umyta qoıǵan joq. Odan saqtaný joly qandaı? Osy oraıda Qyzylorda oblysy sanıtarlyq-epıdemıologııalyq baqylaý departamenti basshysynyń orynbasary Álııa Ábdiqaıymovany áńgimege tartqan edik.
— Kezinde koronavırýs ınfektsııasy eldi dúrbeleńge saldy. Qaterli derttiń búginde beti qaıtqanmen, halyq arasynda boı kórsetip jatqany belgili. Odan saqtaný joly qandaı?
— Pandemııa kezinde ol jaıynda halyqqa keńinen maǵlumat berildi. Ol jóninde kópshilik habardar degen oıdamyn. Ózderińiz biletindeı, atalǵan aýrý vırýs týdyrady. Naýqas adam jótelgende, túshkirgende, sóılegende aýa tamshylary arqyly syrtqy ortaǵa bólinip shyǵady.
Vırýsqa shaldyqqan adamdardyń basym bóliginde aýrýdyń jeńil nemese ortasha klınıkalyq belgisi bolýy múmkin. Olar arnaıy emdi qajet etpesten aýrýdan aıyǵyp jatady.
Degenmen keıbir adamdarda bul aýrý aýyr aǵymda, asqynýymen ótetinin eskersek, medıtsınalyq aralasýdy qajet etedi. Qaýip tobyna egde jastaǵy adamdar jáne qosymsha aýrýy bar, ıaǵnı júrek-qan tamyry, sozylmaly respıratorly, onkologııalyq jáne qant dıabeti bar naýqastar jatqyzylady.
— Vırýsty taratpaı, juqtyrý qaýpin tómendetý úshin qandaı talaptarǵa nazar aýdarýymyz kerek?
— Eń jaqsy tásili — adamdarǵa aýrý týraly jáne onyń qozdyrǵyshynyń taralý mehanızmi týraly habardar etý. Ózińizdi jáne basqa adamdardy ınfektsııadan qorǵaý úshin mynadaı talaptarǵa nazar aýdarýyńyzdy suraımyz. Qol jýý gıgıenasyn saqtaý, jıi sabyndap jýyp, zalalsyzdandyrý antıseptıkter qoldaný qajet. Túshkirý, jótelý gıgıenasyn saqtaý, adamdar kóp jınalatyn oryndarǵa barýdy meılinshe shektep, áleýmettik araqashyqtyq saqtaǵan jón.
Sondaı-aq, nashar jeldetiletin oryndarda betperdeler paıdalaný, ınfektsııaǵa qarsy vaktsınalaýdan ýaqytyly ótý, dárigerlerlerdiń nusqaýlaryn oryndaý, vırýs juqtyrǵan adamdarǵa kútim jasaǵanda sanıtarııalyq-epıdemıologııalyq sharalardy oryndaý artyq emes.
— Qyzylorda oblysynda koronavırýs ınfektsııasynyń taralý jaǵdaıy qalaı boldy?
— Qyzylorda oblysy boıynsha koronavırýs ınfektsııasy boıynsha epıdemıologııalyq ahýal turaqty. Salystyrmaly túrde aıtsaq, ol keıingi kezeńde 2022 jyldan 55 esege tómendegen.
Byltyr oblys boıynsha koronavırýs ınfektsııasyn juqtyrýdyń 118 deregi anyqtaldy.
Onyń ishinde 14 jasqa deıingi balalar úlesi — 47 derek. Basym bóligi aýrý sımptomymen anyqtaldy. Jyl basynan beri aýrýǵa shaldyǵýdyń 4 jaǵdaıy tirkeldi.
