Koronavırýstan saqtaný úshin maskanyń qaı túrin taqqan durys
ALMATY. QazAqparat – Adamdar qandaı maska taqsada óz erki. Kóprettik be, álde birrettik be ózderi sheshedi. Normatıvtik erejede qandaı maska taǵý kerektigi týraly jazylmaǵan. Bul týraly Almaty qalasynyń bas sanıtarlyq dárigeri Jandarbek Bekshın aıtty, dep habarlaıdy QazAqparat tilshisi.
Almaty ákimdiginde ótken brıfıngte sanıtarlyq dárigerden polıtsııanyń qaıta qoldanýǵa bolatyn maskalar úshin aıyppul salýǵa quqyǵy bar-joǵyn surady.
«Adamdar qandaı maska taqsada óz erki. Kóprettik maskaǵa eshkim tyıym salǵan joq. Normatıvtik erejede qandaı maska taǵý kerektigi týraly jazylmaǵan. Esterińizde bolsa, aýrý órshigen aılarda adamdar maskany ózderi qoldan tigip taqty. Koronavırýstan saqtaný úshin mindetti túrde maska taqqan jón. Osyny basa aıtqym keledi»,– dedi Jandarbek Bekshın.
