Koronavırýstan ókpesi 100% zaqymdanǵan elordalyq ana deni saý balany dúnıege ákeldi
Elordadaǵy № 2 kópbeıindi qalalyq aýrýhananyń dárigerleri bosaný kezinde óte aýyr halde bolǵanyna qaramastan, patsıentti sátti bosandyryp aldy. Oǵan koronavırýs jáne aýyr dárejeli eki jaqty vırýstyq pnevmonııa dıagnozy qoıylǵan edi. Aýyr jaǵdaıǵa qaramastan, naýqas salmaǵy 4000 g bolatyn deni saý qyz balany dúnıege ákeldi.
«Bizdiń aýrýhanaǵa naýqas A.Orazbekova shuǵyl túrde óte aýyr jaǵdaıda eki jaqty vırýstyq pnevmonııamen jáne ókpe tininiń jalpy – 100% zaqymdanýymen tústi», – dedi №2 kópbeıindi qalalyq aýrýhana dırektory Nurbol Tursynbaev.
Jansaqtaý bólimshesinde ananyń ómiri úshin dárigerler eki aı kúresken.
«Bosanǵannan keıin naýqastyń jaǵdaıy nasharlady: satýratsııasy tómen, temperatýrasy joǵary, ózdiginen dem ala almady, ıntoksıkatsııa sındromy saqtaldy. Birneshe ret konsılıým júrgizildi, nátıjesinde patsıent EKMO-ǵa (ekstrakorporaldy membranalyq oksıgenatsııa) qosyldy. 20 kún boıy oksıgenatsııa jáne gemodıafıltratsııa júrgizildi», - dep tolyqtyrdy shuǵyl kardıologııa jáne kardıohırýrgııa ortalyǵynyń basshysy Seıil Muhametqalıev.
Naýqas ottegi terapııasyna qosylǵanyna qaramastan, onyń desatýratsııasy ózgermedi. Sondyqtan konsılıýmnyń sheshimi boıynsha naýqas ókpeni jasandy jeldetý apparatyna aýystyrylǵan.
«Eki aı boıy dárigerler men meıirgerler naýqasty emdedi, qarap, barynsha kútti. Kóp uzamaı aýyr ótken otanyń – joǵary tehnologııalyq medıtsınalyq qyzmettiń nátıjesi bárimizdi qýantty. 50 táýlikten keıin patsıent reanımatsııadan beıindi bólimshege aýystyryldy. Bizdiń aýrýhana mamandarynyń komandalyq jumysynyń arqasynda naýqastyń jalpy jaǵdaıy jaqsardy, gemodınamıkasy turaqtandy, eń bastysy – ol óz betinshe tynys alady», – dep atap ótti ınfektsııalyq bloktyń meńgerýshisi Gúlnur Áshirbekova.
Aıta keteıik, medıtsınalyq qyzmetter Mindetti áleýmettik medıtsınalyq saqtanyrý (MÁMS) júıesinde júrgizildi. Saqtandyrylmaǵan azamat úshin mundaı ota, mundaı medıtsınalyq kómek 16 mıllıon teńgeni qurar edi.
