Koronavırýstan kóz jumǵandarǵa eksgýmatsııa jasalmaıdy – dáriger
ALMATY. QazAqparat – Koronavırýstan kóz jumǵandarǵa eksgýmatsııa jasalmaıdy. Bul týraly Taýarlar men qyzmetterdiń sapasy men qaýipsizdigin baqylaý departamentiniń basshysy Aızat Moldaqasymova aıtty, dep habarlaıdy QazAqparat tilshisi.
«Ólgen adamdarǵa qatysty qazir olarmen baılanysta bolǵan adamdar arasynda tekserý bastaldy. Qazir emhana qyzmeti aýrý oshaqtary boıynsha adamdardy tekserip jatyr. Aldaǵy ýaqytta qaıtys bolǵan adamdarmen buryn birge turǵandar da tekseriledi», - dedi Aızat Moldaqasymova onlaın-brıfıng barysynda.
Onyń aıtýynsha, koronavırýstan kóz jumyp, jerlengen adamdardyń denesi qazylyp alynbaıdy.
«Vırýstan kóz jumǵandarǵa eksgýmatsııa jasalmaıdy. Biz pnevmonııamen aýyrǵan adamdar arasynda epıdemıologııalyq taldaý júrgizemiz. 25 sáýirden bastap ókpe pnevmonııasymen aýyrǵan adamdardyń barlyǵyn koronavırýs ınfektsııasyna tekserý bastalady. Bul jaǵdaı boıynsha qalada 277 adam tirkelgen. 248 adam taldaýdan ótti. Olardyń ishinde 25 adamda taldaý oń nátıje kórsetti. Al pnevmonııadan kóz jumǵan adamdardyń aınalasyndaǵy adamdardy vırýsqa tekserip, statıstıkalyq málimet jınaıtyn bolamyz. Búginde polıklınıkalyq qyzmet taldaýdy bastap ketti. Sonyń nátıjesinde aýyrǵandarmen baılanysta bolǵan tulǵalar anyqtalady», - dedi A.Moldaqasymova.
