Koronavırýstan kóz jumǵandardyń 90 paıyzy egde jastaǵylar - dáriger
NUR-SULTAN. QazAqparat- Koronavırýstan kóz jumǵandardyń 90 paıyzy egde jastaǵylar. Bul týraly Ortalyq kommýnıkatsııalar qyzmeti alańynda ótken onlaın brıfıngte professor, QR DSM-niń shtattan tys ınfektsıonıst-dárigeri Baqyt Kósherova aıtty, dep habarlaıdy QazAqparat tilshisi.
«Biz bir jyldan astam ýaqyttan beri COVID-19 pandemııasy jaǵdaıynda ómir súrip kelemiz. Koronavırýs ınfektsııasyn profılaktıkalaý boıynsha júrgizilip jatqan barlyq sharalar tıisti nátıjege áli de jetkize qoıǵan joq. Infektsııalyq aýrýlarmen kúreste eń tıimdi jáne ǵylymı turǵyda negizdelgen ádisterdiń biri - vaktsınatsııa. Dál osy vaktsınatsııanyń arqasynda adamnyń ımmýnıteti túziledi de juqpaly aýrýlarǵa qarsy tura alatyndaı qaýqarly bolady, - dedi Baqyt Kósherova .
Halyqaralyq sarapshylardyń baǵalaýynsha, vaktsınatsııa jyl saıyn 2-3 mln ólim-jitim jaǵdaıynyń aldyn alýǵa septesedi eken.
«Qaraǵandydaǵy medıtsınalyq ýnıversıtet Qazaqstan aýmaǵynda bolǵan ólim-jitim jaǵdaılaryna qatysty zertteý júrgizgen. Zertteýge sáıkes, qaıtys bolǵandardyń 90%-y 60 jastan asqandar jáne COVID-19-dan kóz jumǵandardyń boıyndaǵy qosymsha aýrýlary kórsetkishine sáıkes, olardyń birqatarynda arterııalyq gıpertenzııa derti bolǵan (66%). Shamamen, 50%-y artyq salmaqtan zardap shekken, al júrektiń ıshemııalyq aýrýy men qant dıabeti 40%-dy quraǵan. Jalpy alǵanda, kóz jumǵandaryń 60%-da eki nemese odan da kóp qosymsha derti bolǵan, - dedi ol.
Spıkerdiń aıtýynsha, koronavırýs ınfektsııasymen aýyrǵandar arasyndaǵy eń álsiz top - egde jastaǵy azamattar. Sondyqtan, olar mindetti túrde ekpe saldyrýy qajet. Bul jalpy álemdik gýmanıtarlyq tájirıbe.
