Koronavırýstan kóz jumǵandar sany 490 adamǵa jetti
Koronavırýstan alǵashqy adam mert bolǵanyn estigennen keıin amerıkalyq eki áýe jelisi Gonkongqa ushýyn toqtatty. Japondyq krýız kemesinde 10 adam vırýs juqtyrǵany anyqtaldy. Keme qazir karantınde.
Qytaıdyń Densaýlyq saqtaý ulttyq komıssııasynyń habarlamasyna sáıkes, seısenbi kúni 65 adam mert bolyp, qurlyqtaǵy qaza tapqandardyń jalpy sany 490-ǵa jetti. Olardyń kópshiligi vırýs paıda bolǵan Ýhan qalasy men onyń aımaǵynda tirkeldi.
Qytaıdan basqa elderde jańa koronavırýstan eki adam kóz jumǵan. Seısenbi kúni Gonkongta vırýs oshaǵyna aınalǵan Ýhan qalasyna barǵan 39 jastaǵy azamat qaıtys boldy. Taǵy bir er adam Ýhan qalasyna barǵannan keıin Fılıppınde mert boldy.
Qytaıdyń qurlyqtyq bóliginde vırýs juqtyrǵan 3 887 adam tirkelip, jalpy indetti juqtyrǵandar sany 24 324 adamǵa jetti.
Japonııa Densaýlyq saqtaý mınıstrliginiń málimetinshe, Iokogama portynda karantınde turǵan krýız kemesiniń 10 jolaýshysynda koronavırýsqa tapsyrǵan test oń nátıje kórsetken. Myńdaǵan adam men ekıpaj múshelerin medıtsınalyq tekseristen ótkizý jalǵasyp jatqandyqtan bul kórsetkish ulǵaıýy múmkin.
Qazirgi ýaqytqa deıin 273 adam tekserilip, onyń 31-i kúdikti dep tanylyp, 10-y indetti juqtyrǵany rastaldy. Carnival Corp (CCL.N) kemesiniń bortynda 3700 jolaýshy men ekıpaj músheleri bar.
DDSU taǵy 24 el men aımaqtarda 176 adam indetti juqtyrǵanyn málim etti.