Koronavırýstan kóz jumǵan medqyzmetkerdiń basqa da aýrýlary bolǵan
ALMATY. QazAqparat - Almatyda ótken onlaın brıfıng barysynda qalalyq Qoǵamdyq densaýlyq basqarmasynyń basshysy Tileýhan Ábildaev koronavırýstan qaıtys bolǵan aýrýhana qyzmetkeri týraly aıtty, dep habarlaıdy QazAqparat tilshisi.
Kóz jumǵan áıel Ortalyq klınıkalyq aýrýhananyń sharýashylyq jaǵynda qyzmet istegen.
Patsıent COVID-2019 ınfektsııasyna qarsy DSM belgilegen hattama boıynsha em qabyldaǵan.
«Halyq arasynda №12 atalyp ketken Ortalyq klınıkalyq aýrýhananyń sharýashylyq bóliminiń qyzmetkeri 16 mamyrda bizdiń qalalyq klınıkalyq ınfektsııalyq aýrýhanada qaıtys boldy. Jalpy em-sharalar QR DSM bekitken protokolǵa saı tolyq jasaldy. Bul kisiniń boıynda basqa aýrýlar bolatyn», - dedi Tileýhan Ábildaev.
Basqarma basshysynyń aıtýynsha, bul derek qalalyq Qoǵamdyq densaýlyq basqarmasynda komıssııa tarapynan qaralyp, qorytyndysy QR DSM jiberildi.
«QR DSM emdik profılaktıkalyq uıym departamenti tarapynan qorytyndy sheshim qabyldanǵannan keıin qandaı sebeppen qaıtys bolǵany anyqtalatyn bolady», - dedi T.Ábildaev.
Almatyda Ortalyq qalalyq klınıkalyq aýrýhananyń lıfteri koronavırýstan qaıtys bolǵany týraly keshe jazǵan bolatynbyz.
