Koronavırýstan kóz jumǵan áıelmen baılanysta bolǵan 16 jambyldyq aýrý juqtyrmaǵan
TARAZ. QazAqparat – Aqmola oblysynyń koronavırýstan qaıtys bolǵan turǵynymen baılanysta bolǵan 16 jambyldyqtan alynǵan taldaý nátıjesi shyqty, dep habarlaıdy QazAqparat oblys ákiminiń baspasóz qyzmetine silteme jasap.
Buǵan deıin habarlanǵandaı, 15-18 naýryz aralyǵynda koronavırýstan qaıtys bolǵan Aqmola oblysynyń turǵyny Jambyl oblysynyń Shý jáne Merki aýdandaryna kelip-ketken.
Medıtsınalyq jáne epıdemııaǵa qarsy qyzmetter marqummen baılanysta bolǵan 16 adamdy anyqtady: Shý aýdanynda – 10, Merki aýdanynda – 6 adam. Olardan koronavırýs ınfektsııasyna alynǵan taldaý qorytyndysy teris nátıje kórsetti.
Azamattardyń jaǵdaıy birqalypty, ınfektsııa belgileri joq. Olar 14 kúndik karantındik statsıonarǵa jatqyzylǵan.
Kelgen oryndarynda medıtsınalyq qyzmetkerler epıdemııaǵa qarsy qajetti is-sharalar júrgizdi.
