Koronavırýstan kóz jumǵan áıelge qatysty tekserý júrgizilip, bas dáriger jazalandy

NUR-SULTAN. QazAqparat – Áleýmettik jelide koronavırýstan qaıtys bolǵan áıeldiń jedel járdemdi úsh ret shaqyrǵanyna qaramastan aýrýhanaǵa jatqyzylmaǵany týraly aqparat tarady. Osy jaǵdaıǵa qatysty QR Densaýlyq saqtaý mınıstri Eljan Birtanov pikir bildirdi, dep habarlaıdy QazAqparat tilshisi.

«Aqmola oblysynda qaıtys bolǵan áıeldiń qazasyna baılanysty jaqyndary men týystaryna taǵy da kóńil aıtamyn. Áleýmettik jelide taraǵan aqparat boıynsha Aqmola oblysynyń densaýlyq saqtaý basqarmasy qyzmettik tekserý júrgizdi. Negizi bizge resmı túrde eshkim hat jazǵan joq. Tekserý nátıjesinde medıtsınalyq qyzmetkerler jaǵdaı koronavırýsqa baılanysty bolýy múmkin ekenin boljamaǵany jáne jedel járdemdi birinshi ret shaqyrǵan kezde naýqas aýrýhanaǵa jatqyzylmaǵany anyqtaldy. Naýqasqa sýyq tııýine baılanysty em-dom jazyp bergen. Naýqastyń týystaryna túsindirý jumystary júrgizilmegen, sonyń saldarynan ol aýrýhanaǵa kesh jatqyzylǵan. Bul jaǵdaı adam ólimimen aıaqtaldy. Tekserý barysynda osyndaı kemshilikter anyqtalyp, jedel járdem qyzmetiniń bas dárigeri men densaýlyq saqtaý basqarmasynyń basshysyna tártiptik jaza qoldanyldy», - deıdi QR Densaýlyq saqtaý mınıstri Eljan Birtanov.

Onyń aıtýynsha, test nátıjesine qatysty qatelikter bolǵan.

«Tehnıkalyq sebeppen test nátıjesin berýge qatysty qatelikter bolǵan. Sol kúni zerthanada júkteme kóp bolǵan, sondyqtan testiń sońǵy nátıjesi sál keshirek shyqqan. Test nátıjesi naýqas qaıtys bolǵannan keıin daıyn bolǵan. Bul jaǵdaıǵa qatysty máseleni talqylap, zerthanalar turaqty túrde jumys isteý jaǵyn qarastyrdyq. Tek bir zerthananyń ózinde ǵana kúnine myń test jasalady. Bir qurylǵydan eń kóp degende 30 test ótkizýge bolady. Biz mundaı jaǵdaı qaıtalanbas úshin bar kúshimizdi salamyz», - deıdi ol.

Eske sala keteıik, buǵan deıin Aqmola oblysynda 64 jastaǵy áıeldiń koronavırýstan qaıtys bolǵanyn habarlaǵan edik.