Koronavırýstan kóz jumǵan áıel 14 naýryzda qudalyqta bolǵan
TALDYQORǴAN. QazAqparat - Koronavırýstan qaıtys bolǵan áıeldiń naqty qaı ýaqytta qudalyqta bolǵany anyqtaldy, dep habarlaıdy QazAqparat tilshisi.
«Koronavırýstan qaıtys bolǵan áıel 14 naýryz kúni qudalyqta bolǵan. Qudalyq Almatyda ótken», - dedi Almaty oblysy ákiminiń baspasóz hatshysy Ǵalymurat Júkel.
Aıta keteıik, buǵan deıin koronavırýstan qaıtys bolǵan adammen qarym-qatynasta bolǵan eki adam Almaty oblysynda oqshaýlanǵanyn habarlaǵan bolatynbyz.
«Koronavırýstan qaıtys bolǵan adammen qarym-qatynasta bolǵan eki adam Almaty oblysynda oqshaýlandy. Olar qazir aýrýhanada jatyr. Endi osy eki adammen qarym-qatynasta bolǵan taǵy bes adam anyqtaldy. Olar da dárigerlerdiń bqylaýynda. Barlyǵynyń analızderi tolyq alynǵan. Nátıjesin kútýdemiz, daıyn bolǵanda qosymsha aqparat beremiz», - Almaty oblystyq Densaýlyq saqtaý basqarmasynyń baspasóz hatshysy Láılim Áýbákirova.
Esterińizge salsaq, 26 naýryz kúni elimizde áıel adam koronavırýs dertinen kóz jumdy. Ol Aqmola oblysy Qosshy aýylynyń 64 jastaǵy turǵyny. Málim bolǵandaı, ol shetelge shyqpaǵan jáne JRVI, koronavırýs dertine shaldyqqandarmen baılanysta bolmaǵan. 13-17 naýryz aralyǵynda Almatyda jáne Shýda qonaqta bolǵan.
