Koronavırýstan keıingi ońaltý jumystary qalaı júrgiziledi - dáriger jaýaby
ALMATY. QazAqparat- Almatydaǵy №36 qalalyq emhananyń bas dárigeri Gúljaınat Tilegen koronavırýstan keıini ońaltý jumystary týraly aıtty, dep habarlaıdy QazAqparat tilshisi.
Dárigerdiń aıtýynsha, koronavırýspen sımptomsyz aýryp shyqqandar arnaıy emdeýdi jáne ońaltýdan ótýdi qajet etpeıdi. Emdelý kovıdi pnevmonııamen aýyrǵandarǵa qajet, sebebi, ol kezde ókpe jáne qalǵan dene músheleriniń gıpoksııasy týyndaıdy. Sondyqtan ortasha jáne aýyr túrde koronavırýspen aýyrǵandar aýrýhanadan tolyq saý bolyp shyqpaıdy.
«Koronavırýstan keıingi asqynýlar kovıdten keıingi sındrom dep atalady. KVI- den keıingi sındrom uzaq ýaqyt saqtalýy múmkin, aılarǵa sozylady. Kovıdten keıingi sımptomdar: ókpe fıbrozy, júrek-qantamyr aýrýynyń asqynýy, kóp uıyqtaý, únemi álsizdikke ushyraý, jadynyń nasharlaýy, kognıtıvti buzýshylyqtar (durys yqylas aýdarmaý), demikpe, depressııa jáne taǵy basqa sındromdar bolady»,- deıdi dáriger.
Onyń sózinshe, aǵzany qalpyna keltirý úshin aýyrǵan adamdarǵa ońaltýdan ótý qajet. Bul ókpe men tynys alý fýnktsııalarynyń tolyqqandy jumys isteýin qalpyna keltirip, pnevmofıbrıozdy boldyrmaıdy.
«Ol úshin turǵylyqty jer boıynsha emhanaǵa, ýchaskelik dárigerge barý kerek, ol adamnyń jaı-kúıiniń aýyrtpalyǵyn baǵalaıdy. Patsıenttiń kórsetkishteri boıynsha ońaltý ortalyǵyna nemese emhanalyq jaǵdaı boıynsha ońaltýǵa jiberedi. Ol tynys alý jattyǵýy, emdik dene shynyqtyrý, trenajerlarda jattyǵý jasaý, fızıoterapııa, dári-dármekpen terapııa júrgizý, fıtoterapııadan turady. Ońaltýdyń bir kýrsynyń merzimi 10-14 kúnge sozylady. Patsıentte otteginiń jetispeýi sebebinen úreı, stress, depressııa sekildi sımptomdar týyndaıdy. Mundaı jaǵdaıda psıhoterapevt qaraıdy»,- dep atap ótti spıker.
