Koronavırýstan keıin qandaı naýqastar ońaltýmen qamtylady

NUR-SULTAN. QazAqparat - Ońaltý kómegi jónindegi ulttyq úılestirýshi Aıgúl Hasenova postkovıdti saýyqtyrýmen qaı naýqastar qamtylatynyn aıtty, dep habarlaıdy QazAqparat tilshisi.

«Ońaltý is-sharalaryna toqtalatyn bolsaq, birinshi kezekte ókpesi 25 paıyz zaqymdanǵan patsıentter, sondaı-aq qandaı da bir ilespe aýrýy bolǵandar eskeriledi. Ekinshi kategorııada ilespe aýrýy bolmasa da, ókpesi 50 paıyz zaqymdanǵandar qamtylady», - dedi A. Hasenova onlaın rejımde ótken talqylaý barysynda.

Onyń aıtýynsha, naýqastyń jaǵdaıyna qaraı saýyqtyrýdyń tutas baǵdarlamasy nazarǵa alynyp, baǵalanady.

«Birinshi kezekte adamdar tynys alý gımnastıkasymen qatar, em qabyldaıdy. Munymen qosa, mehanoterapııa, fızıoterapııa sekildi qadamdar bolady. Bul turǵyda ońaltý uzaqtyǵy 14 kún jáne odan da kóp merzimde júrgiziledi», - dedi Aıgúl Hasenova.

Aıta keteıik, buǵan deıin Aıgúl Hasenova Qazaqstanda qandaı aýrýlar kezinde ońaltý kómegi usynylatynyn aıtqan edi.