Koronavırýstan keıin bedeýlikke shaldyǵý yqtımaldyǵy qandaı - sarapshy jaýaby
NUR-SULTAN. QazAqparat – Ulttyq ftızıopýlmonologııa ǵylymı ortalyǵy dırektorynyń klınıkalyq jáne ǵylymı jumystar jónindegi orynbasary, professor Lázzat Eralıeva koronavırýstan keıin bedeýlikke shaldyǵý yqtımaldyǵy týraly aıtty, dep habarlaıdy QazAqparat tilshisi.
Ortalyq kommýnıkatsııalar qyzmetinde ótip jatqan brıfıngide BAQ ókilderi «Qazaqstanda koronavırýs ınfektsııasynyń saldarynan bedeýlikke tap bolǵan adamdar bar ma?» degen saýal qoıdy.
«Ókinishke qaraı, ondaı statıstıka bar. Men ekstrakorporaldy uryqtandyrý ortalyqtarynda tekserýden ótip jatqan adamdardyń ishinde koronavırýs ınfektsııasynan keıin aspermııaǵa, ıaǵnı spermatozoıdtardyń bolmaýyna ushyraǵan er adamdar bar ekenin bilemin», - dep túsindirdi sarapshy.
Onyń aıtýynsha, aǵzadaǵy bul aqaýdy joıýǵa bolady.
«Baqytymyzǵa oraı, úsh-tórt aıdan keıin jaǵdaı jaqsarady. Biraq spermatozoıdtardyń sany aýrý juqtyrmaı turǵan kezge qaraǵanda áldeqaıda tómen bolady. Qazir munyń bári zerttelip jatyr. Munyń áli tyń derekter ekenin túsinýlerińiz kerek», - dedi Lázzat Eralıeva.
