Koronavırýstan qaıtys bolǵandar bólek zıratqa jerlene me

NUR-SULTAN. QazAqparat - Koronavırýstan qaıtys bolǵan adamdar kez kelgen zıratta jerlene beredi. Bul týraly QR DSM Taýarlar men kórsetiletin qyzmetterdiń sapasyn jáne qaýipsizdigin baqylaý komıtetiniń bas sarapshysy Janat Jamalbekova aıtty, dep habarlaıdy QazAqparat tilshisi.

«Adamnyń koronavırýstan qaıtys bolǵany zerthanalyq zertteýler arqyly anyqtalǵan bolsa, onda múrdeni týystaryna jerleýge bermeımiz. Múrdeni patologııalyq-anatomııalyq soıý jumystary júrgizilmeıdi. Múrdehanadan tikeleı zırat basyna aparyp jerleýge beremiz. Osyndaı talap bar. Bul rette múrdeni jerleý úshin basqa zırat qajet emes. Qazirgi qala ishindegi nemese aýyl shetindegi zırattarǵa jerleı berýge bolady», - dedi ol.

Degenmen, onyń aıtýynsha, jerleý rásimderinde sanıtarlyq-epıdemıologııalyq talaptar, bıologııalyq qaýipsizdik máseleleri saqtalýy tıis.

«Janazaǵa tek jaqyn týǵan-týystarynyń bolǵany durys. Olar janaza kezinde 1-2 metr ara qashyqtyq saqtap, medıtsınalyq maska taqqandary jón. Máıitti de tek múrdehanada ǵana jýyndyrý kerek. Jerleý rásimine qatysatyn adamdar vırýstan qorǵaıtyn qorǵanys quraldaryn qoldanýy qajet», - dedi Janat Jamalbekova.

Aıta keteıik, qazirgi ýaqytta elimizde 10 naýqas koronavırýs indetinen kóz jumdy.