Koronavırýstan qaıtys bolǵan medıtsına qyzmetkerlerin eske alý sharasy ótti
ShYMKENT. QazAqparat – Shymkentte koronavırýstan qaıtys bolǵan medıtsına qyzmetkerlerin eske alý sharasy ótti, dep habarlaıdy QazAqparat tilshisi.
«Ózgeni qutqaryp, óz janyn pıda etken» atty aktsııa aıasynda pandemııa kezinde kóz jumǵan aq halattylardyń týǵan-týystaryna tósbelgiler tabystaldy. Elimizde qaýipti indet órshigen tusta Túrkistan oblysynda 32, al Shymkent qalasynda 21 aýrýhana qyzmetkeri qaıtys bolǵan edi. Olardyń qatarynda dárigerler men medbıkeler, tazalyq qyzmetkerleri men júrgizýshiler bar. «Ońtústik» medıtsına qyzmetkerleri qaýymdastyǵy» qoǵamdyq birlestiginiń uıymdastyrýymen ótken shara barysynda marqumdardyń eren erligi sóz bolyp, bir sát únsizdikpen eske alý rásimi ótti. Árýaqtarǵa arnalyp quran baǵyshtalyp, eskerkish taqtaıshaǵa gúl shoqtary qoıyldy. Jıynǵa qatysqan týǵan-týystaryna «Ómir úshin», «Altyn dáriger» jáne «Meıirim» tósbelgi-medaldary tapsyryldy. Mundaı bastamaǵa kópshilik rızashylyǵyn bildirip, óz usynystaryn ortaǵa saldy. Aktsııany uıymdastyrýǵa «DENSAULYG» densaýlyq saqtaý uıymdary jumyskerleriniń kásipodaǵy men ózge de kásipodaq uıymdary atsalysty.
Aıta keteıik, buǵan deıin pandemııa kezinde Túrkistan oblysy boıynsha qaza tapqan medıtsına qyzmetkerleriniń otbasyna kásipodaq uıymy atynan kómek retinde 100 myń teńgeden berilgen bolatyn.
