Koronavırýstan qaıtys bolǵan dárigerlerdiń barlyǵynyń otbasyna ótemaqy tólendi - DSM

NUR-SULTAN. QazAqparat - Kásibı qyzmetin atqarý barysynda koronavırýs juqtyrǵan 8 863 medıtsına qyzmetkerine ótemaqy tólendi. Bul týraly QR Densaýlyq saqtaý birinshi vıtse-mınıstri Marat Shoranov aıtty, dep habarlaıdy QazAqparat tilshisi.

«Elimizde indet jarııalanǵan sátten beri 12 983 densaýlyq saqtaý qyzmetkeri koronavırýs juqtyryp aldy. Olardyń ishinde óńirlik komıssııalar kásibı qyzmetin atqarý barysynda COVID-19-ǵa jáne ókpe qabynýyna shaldyǵýǵa qatysty ótinimderdiń 72 paıyzyn nemese 9 309 jaǵdaıdy naqtylady. 21 qazandaǵy derekke sáıkes, kásibı qyzmetin atqarý barysynda COVID-19-ǵa shaldyǵýdyń naqtylanǵan jaǵdaılary boıynsha 8 863 medıtsına qyzmetkeri ótemaqy aldy. Bul naqtylanǵan 9 309 ótinimniń 95 paıyzyn quraıdy», - dedi ol Ortalyq kommýnıkatsııalar qyzmetindegi baspasóz máslıhatynda.

Sonymen qatar ol kásibı qyzmetin atqarý barysynda koronavırýsty juqtyrýdan qaza tapqan 182 medıtsına qyzmetkerine qatysty jaıtty óńirlik komıssııalar qarap, oń sheshim qabyldaǵanyn aıtty.

«Búgingi kúni qaza tapqan medıtsına qyzmetkerleriniń barlyǵynyń otbasylary ótemaqy aldy», - dedi Marat Shoranov.