Koronavırýstan emdelip shyqqan aqtóbelik úıinde baqylaýda bolady
AQTÓBE. QazAqparat – 22 naýryz kúni indetke shaldyqqan aqtóbelik saýyǵyp, aýrýhanadan shyqty, dep habarlaıdy QazAqparat tilshisi.
22 naýryz kúni saǵat 06:05-te Máskeý arqyly Ispanııadan kelgen aqtóbelikten koronavırýs ınfektsııasy anyqtalǵan bolatyn. Búgin oblystyq densaýlyq saqtaý basqarmasynyń basshysy Áset Qalıev onyń emdelip shyqqanyn habarlady.
«Aqtóbede epıdemıologııalyq ahýal turaqty. Qazirgi kezde ınfektsııalyq, provızorlyq jáne karantındik gospıtalde barlyǵy 226 adam jatyr. Úıdegi karantınde 763 turǵyn bar. Statsıonarda jatqan 11 naýqastan koronavırýs ınfektsııasy anyqtalǵany belgili. Búginde 9 naýqastyń jaǵdaıy qanaǵattanarlyq, bireýiniń jaǵdaıy aýyr, bireýinde ortasha aýyr. Bir naýqas aıyǵyp shyqty. Hattamaǵa sáıkes em tolyq júrgizildi. 15-16 táýlikte analız alynyp, vırýs anyqtalmady. Al 17 táýlikte esh shaǵym aıtpady, taǵy 14 kún úıinde baqylaýda bolady», - dedi oblystyq densaýlyq saqtaý basqarmasynyń basshysy Áset Qalıev.
