Koronavırýstan emdelgender qandaı talaptardy oryndaýy kerek

NUR-SULTAN. QazAqparat – Bıyl koronavırýsty qaıta juqtyrý derekteri álem elderinde tirkelip jatqandyǵy týraly aqparat taraǵany belgili. Sonymen qatar qarasha aıynda QR Densaýlyq saqtaý mınıstrligi ókilderi indetti qaıta juqtyrý deregi Qaraǵandy oblysynda tirkelgenin aıtqan bolatyn.

Osy oraıda QR DSM Qoǵamdyq densaýlyq saqtaý ulttyq ortalyǵy Qoǵamdyq densaýlyqty nyǵaıtý ortalyǵynyń basshysy Jazıra Emberdıeva koronavırýs ınfektsııasymen aýyryp, jazylǵandarǵa paıdaly keńesin aıtty.

«Durys tamaqtaný kerek. Adam aǵzasyna aqýyz, maılar jáne kómirsý qajet. Kókónis pen jemis-jıdekke kóbirek mán berińiz. Táttilerden de bas tartpańyz (tek belgili bir kólemde) – olar kóńil-kúıińizdi jaqsartady. Taza aýada kún saıyn serýendeýge de mán berý kerek. Koronavırýs ınfektsııasynan soń jáne aǵzanyń uzaq ýaqyt álsireýinen keıin sizge óte qajet kúsh qýat beredi», - dedi J. Emberdıeva.

Bul turǵyda ol ol kún saıynǵy tynys alý gımnastıkasyna toqtaldy. Dem alýdy – dem shyǵarýdy baqylaý arqyly qarapaıym jattyǵý jasaý kerek. Aýrýdan keıin aǵza áli de kúsheımegendikten, jattyǵýdy shamadan tys kóp jasamańyz, júktemelerdi birtindep arttyrǵanyńyz durys. Tynys alý gımnastıkasy ókpeniń qalypty jumys isteýine yqpal etedi jáne ony ottegimen qanyqtyrady.

«7-8 saǵattan kem bolmaıtyn tolyqqandy uıqy kerek. Uıyqtar aldynda bólmeni mindetti túrde jeldetý kerek jáne 2 – 3 saǵat buryn tamaqtanǵan durys. Bul tez qalypqa kelýińizge kómektesedi. Streske jáne úreıge, ýaıymǵa salynbaý kerek. Qazir barlyǵymyz – aýyrǵandar da, aýyrmaǵandar da stress jaǵdaıyndamyz. Atalǵan ınfektsııanyń ereksheligi gıpoksııa, otteginiń jetispeýi. Bul qorqynyshtyń jáne depressııanyń alǵysharty bolýy múmkin. Mundaı jaǵdaıda psıhologten keńes alýyńyzǵa bolady. Ol sizge alańdamaýǵa jáne senimdi bolýǵa keńes beredi. Álde jaqyn adamdaryńyzben qarym-qatynasty kúsheıtińiz, tabıǵat aıasyna shyǵyńyz, ıaǵnı jaqsy kóńil-kúı tezirek qalypqa kelýge kómektesedi», - dedi maman.