Koronavırýstan ambýlatorlyq emdelýshiler preparatty dárihanadan kýáligin kórsetip ala beredi
QR Densaýlyq saqtaý mınıstrliginiń aqparattyq ortalyǵy taratqan málimetter boıynsha, COVID-19 anyqtalǵan naýqastarǵa tirkelgen meken-jaıy boıynsha barlyq emhanalarda tegin dári-dármek beriledi. Densaýlyq saqtaý mınıstrligi indetti anyqtaýdyń jáne emdeýdiń hattamasyna tegin taratylatyn dáriniń 5 túrin engizdi. Olar: Paratsetamol, Ibýprofen, antıkoagýlıanttar, Rıvaroksaban, Apıksaban jáne Dabıgatran.
«Ózin jaısyz sezingen nemese dene qyzýy kóterilgen adamdar dereý emhanaǵa baryp qaralýy tıis. Eger mamandar koronavırýsqa uqsastyǵy bar belgilerge kóz jetkizgen jaǵdaıda nusqaýlyq beredi. Tutynýǵa qajetti preparattardyń elektrondy tizimin jazady. Sáıkesinshe, dárihanaǵa baryp jeke basyńyzdy kýálandyratyn qujatty kórsetip qajetti dárini tegin alasyz. Eger qajet dári bolmaǵan jaǵdaıda «SQ-Farmatsııanyń» 1439 (qońyraý shalý tegin) baılanys ortalyǵyna habarlasý kerek. Operatorlar máseleni anyqtap, qajet dári qolyńyzǵa tıgenshe járdem jasalady», delingen habarlamada.
«Árbir óńir óziniń qajettiligine qaraı tapsyrys berdi. Osy aptadan bastap el turǵyndary emhanalardan tegin dárini ala alady. Dárigerlerdiń preparattardy taǵaıyndap jazyp berýine barlyq múmkindik jasalǵan»,-dep málimdedi «SQ-Farmatsııa» JShS Basqarma tóraǵasy Erhat Esqalıev.
Aıta keterligi, Apıksaban jáne Dabıgatran dárileriniń Qazaqstanda balamasy joq. Buǵan deıin bul dáriler statsıonarlyq kómek úshin qoldanylǵan jáne «SQ-Farmatsııanyń» qorynda jetkilikti deńgeıde saqtaýly tur. Sonymen qatar, «Nobel» Almaty farmatsevtıkalyq fabrıkasy
Rıvaroksaban dárisin tirkedi. Endi ol emhanalarǵa Rıvaroks taýarlyq ataýymen jetkiziledi. Atalǵan preparat «SQ-Farmatsııanyń» qoımasyna jetkizildi, qazirgi ýaqytta elimizdegi emhanalarǵa jóneltilip jatyr.
«Otandyq zaýyt óndiristi iske qosty. Demek, ishki naryqtyń suranysyn tolyqtaı oryndaýǵa múmkindik bar. Sonymen qatar, ekonomıkalyq tıimdiligi de joǵary. Sheteldik dárilerge qaraǵanda 40 paıyz arzan», - dedi Erhat Esqalıev.
Sonymen qatar, Erhat Esqalıev qazirgi ýaqytta Paratsetamol dárisin satyp alýdyń rásimi júrip jatqanyn jetkizdi. Satyp alý aıaqtalǵansha onyń ornyn Ibýprofen preparaty almastyrady.