Koronavırýspen kúrestegi vaktsınanyń róli qandaı
NUR-SULTAN. QazAqparat – QR DSM Ulttyq Qoǵamdyq densaýlyq saqtaý ortalyǵy Sanıtarlyq-epıdemıologııalyq saraptama jáne monıtorıng ǵylymı-praktıkalyq ortalyǵy dırektorynyń orynbasary Manar Smaǵul vaktsınanyń koronavırýspen kúrestegi rólin túsindirdi, dep habarlaıdy QazAqparat tilshisi.
«Vaktsına týraly aıtqanda, onyń medıtsınanyń eń úlken jetistigi ekenin atap ótken jón. Qazirgi ýaqytta vaktsınalar juqpaly aýrýlarǵa qarsy eń tıimdi qorǵanys sharasy bolyp sanalady. Vaktsınalaý arqyly sheshek sııaqty aýrýlar joıyldy. Vaktsınanyń tıimdiligi men jetistikteri týraly tolassyz aıtýǵa bolady. Múmkindigi men áleýeti bar barlyq elder kúsh-jigerin koronavırýsqa qarsy vaktsına jasaýǵa baǵyttady. Karantın jaǵdaıynda turyp jatqanymyzǵa on aı boldy. Al vaktsına qozǵalys, qarym-qatynas erkindigin beredi. Sonyń arqasynda koronavırýstyń taralýyna kedergi keltiremiz dep úmittenemin», - dedi sarapshy Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, vaktsına qanshalyqty tez daıyndalsa da, ony ázirleýge jáne óndirýge óte joǵary talaptar qoıylǵan.
«Vaktsınanyń sapasyna qoıylatyn bul talaptar eshqashan ózgermeıdi, olar barlyq senimdilik deńgeıine sáıkes kelýi kerek. Vaktsına jappaı paıdalanýǵa berilse, demek ol barlyq qaýipsizdik talaptaryna jáne álemdik standarttarǵa saı keledi. Vaktsınanyń sapasyna senýge bolady», - deıdi M. Smaǵul.
Eske salsaq, buǵan deıin Qazaqstanda koronavırýsqa qarsy vaktsına 1 aqpannan bastap egiletindigi habarlandy.Sonymen qatar 18 jasqa tolmaǵan balalar men 65 jastan asqan adamdarǵa vaktsınanyń tıimdiligi men qaýipsizdigi týraly málimet joq, sondyqtan bul jastaǵylarǵa ekpe salynbaıdy. Al Úkimet otyrysynda Prezıdent Qasym-Jomart Toqaev ákimderge vaktsınatsııa máselesinde dúrbeleńge jol bermeýdi tapsyrdy.
