Koronavırýspen kúreste qaza bolǵan jambyldyq dárigerler marapattaldy
TARAZ. QazAqparat – Táýelsizdik merekesine oraı Tarazda koronavırýstan qaıtys bolǵan birqatar dárigerler marapattaldy. Marapattar marqumdardyń jaqyndaryna tabystaldy,-dep habarlaıdy QazAqparat tilshisi.
Qazaqstan Respýblıkasynyń Táýelsizdik kúnine arnalǵan Jambyl oblystyq kópbeıindi aýrýhanasynyń májilis zalynda saltanatty jıyn ótti. Merekege oraı uıymdastyrylǵan marapattaý rásiminde oblystyq densaýlyq saqtaý basqarmasynyń basshysy Áset Qalıev densaýlyq saqtaý salasynyń 29 jylda jetken jetistikteri jóninde az-kem toqtalyp ótti. Ol dárigerlerdi táýelsizdik kúnimen quttyqtap, birqatar marapattardy tabystady.
Atap aıtsaq, Ulttyq Medıtsınalyq Assotsıatsııasynyń «AVI VITAE» ordenimen pandemııa kezinde qaıtys bolǵan dárigerler Aıdar Muqataev, Aqylbaı Arynov, al «Altyn dáriger» medalimen Dáýletbaı Arynbaev, Úmitkúl Kelgenbaeva, Gúlmıra Qyrǵyzalıeva, Muhtar Tumataev marapattaldy. Medaldar marqumdardyń jaqyndaryna tabystaldy.
Sondaı-aq, shara barysynda eleýli eńbek etip júrgen basqa da medıtsına qyzmetkerleri «Meıirim», «Halyq alǵysy», «Eńbek Ardageri» medaldaryan, «Densaýlyq saqtaý isiniń úzdigi» tósbelgisi jáne QR densaýlyq saqtaý mınıstriniń, oblys ákiminiń Qurmet gramotalary men alǵys hattaryna ıe boldy.
Basqosýda, saladaǵy jyldyq jumys qorytyndylanyp, óńir medıtsınasynyń jetistikteri saralandy.
«Jalpy, pandemııa kezinde ereń eńbek etken 120 medıtsına qyzmetkerleri marapattaldy. Marapat – istelgen jumysqa baǵa berý ǵana emes, eńbek etýshi azamattyń qarymyn shyńdaı túsý»,-dedi Áset Qalıev.
