Koronavırýspen kúreste belsendilik tanytqan 343 adam «Halyq alǵysy» medalimen marapattaldy
NUR-SULTAN. QazAqparat – QR Ortalyq kommýnıkatsııalar qyzmetinde ótken «Biz Birgemiz» onlaın-forýmynda koronavırýs pandemııasymen kúreste erekshe kózge túsken azamattar «Halyq alǵysy» medalimen marapattaldy, dep habarlaıdy QazAqparat tilshisi.
Densaýlyq saqtaý, bilim berý, áleýmettik qorǵaý jáne pandemııa men kúreste eleýli eńbek etip, jemisti jumys istegeni úshin respýblıka boıynsha túrli salanyń 343 mamany marapattalady. Olardyń arasynda 60 dáriger, 39 polıtseı, 30 áskerı qyzmetshi, 41 volonter, 34 metsenat, 38 mádenıet jáne bilim ókilderi, 25 BAQ qyzmetkeri bar.
Marapatty QR Prezıdenti Ákimshiligi Basshysynyń birinshi orynbasary Dáýren Abaev, QR Aqparat jáne qoǵamdyq damý mınıstri Aıda Balaeva, QR Densaýlyq saqtaý mınıstri mindetin atqarýshy Alekseı Tsoı, QR Іshki ister mınıstriniń orynbasary Alekseı Kalaıchıdı jáne QR Memlekettik qyzmet isteri agenttigiń tóraǵasy Anar Jaıylǵanova tabystady.
«Osy sahnada ózimniń eńbek jolymdy eske aldym. Kardıohırýrgııadaǵy 15 jylda qýanyshty jáne qaıǵyly sátter boldy. Biraq, dál búgingideı qaterli pandemııa saldaryn kórmedik. Bul koronavırýstyń ereksheligi –balalarymyz ben ata-analarymyzǵa zaqym keltirip jatyr. Búgin tańerteń óz áriptesime jansaqtaý júıesin ornattym. Bul óte qorqynyshty. Bizdiń únemi jumysta bolyp, otbasymyzdan jyraqta júrgenimiz úshin emes, vırýstyń shekaraǵa baǵynbaıtyny qorqynyshty. Baqytymyzǵa oraı, naýqastardyń kórer jaryǵy bar nemese úmitsiz dep bólip jatqan joqpyz. Barlyǵyn birdeı emdeýge tyrysýdamyz», - dedi Ulttyq ǵylymı kardıohırýrgııa ortalyǵy bólimshesiniń basshysy Tımýr Lesbekov marapattaý rásiminde.
Dárigerdiń aıtýynsha, koronavırýspen kúres arqyly edáýir tájirıbe men qural-jabdyqtar jınaqtaldy jáne eń bastysy – vırýsty jeńý múmkindigi bar.
«Munda bir ǵana dárigerlerdiń eńbegi jetkiliksiz. Tutas halyqtyń birigýi mańyzdy. Koronavırýspen kúres – ár adamnyń mindeti. Osylaı ǵana qaterli aýrýdy jeńe alamyz. Búgingi marapat úshin, azamattarymyzdy qorǵaý múmkindigi úshin shyn júrekten qýanyshtymyn», - dedi dáriger.
Marapattaý rásimine QR Prezıdenti Qasym-Jomart Toqaev jáne barlyq óńirlerdegi medal ıegerleri onlaın qatysty.
Elordada Ulttyq ǵylymı kardıohırýrgııa ortalyǵy bólimshesiniń basshysy Tımýr Lesbekov, «Nomad MMA» respýblıkalyq federatsııasynyń prezıdenti Gadjı Gadjıev, Ulttyq volonterler jelisiniń tóraǵasy Vera Kım, Meıirimdiler klýbynyń jetekshisi Gúlmıra Ábdirasheva, metsenat, qoǵam qaıratkeri Oralbek Botbaı, Bıologııalyq qaýipsizdik máselleri ǵylymı-zertteý ınstıtýtynyń bas dırektory Kúnsulý Zakarııa, Bas áskerı klınıkalyq gospıtaldiń neırohırýrg dárigeri Erjan Rysqalıev, Nur-Sultan qalasy Polıtsııa departamentiniń ınspektory Artýr Botabekov, elordalyq volonter Abzalbek Sultanbek, ǵalym, kásipker Ámir Qýat jáne «Jas Otan» jastar qanatynyń sarapshysy Aıan Hafız marapat aldy.
Foto: ortcom.kz
