Koronavırýspen kúreske densaýlyq saqtaý júıesiniń búkil áleýmeti jumyldyryldy
«Koronavırýs indetimen kúreske densaýlyq saqtaý júıesiniń búkil áleýmeti baǵyttalǵan. Epıdemııaǵa qarsy is-sharalarǵa 46 myńnan astam medıtsına qyzmetkeri jumyldyryldy. Qatań shekteý sharalaryn engizýdiń arqasynda koronavırýs indeti boıynsha epıdemıologııalyq ahýaldy turaqtandyrýǵa, medıtsına uıymdaryna júktemeni aıtarlyqtaı tómendetýge qol jetkizildi. Qazirgi ýaqytta juqtyrýdyń táýliktik ósimi 0,07 paıyzǵa deıin tómendep, barlyq naýqastardyń 95 paıyzy jazyldy. Tósek-oryn júktemesi 12 paıyzdy quraıdy», - dedi Asqar Mamın.
Premer-Mınıstrdiń atap ótýinshe, kúz-qys kezeńindegi epıdemıologııalyq ahýalǵa qatysty boljamǵa oraı Úkimet koronavırýs indetiniń oryn alýy múmkin jańa tolqynyna keshendi sharalar qabyldap jatyr. Jyldyń sońyna deıin jetetin jeke qorǵanys zattarynyń qory jınaqtalyp, PTR-testileý qýaty táýligine 43 myńǵa deıin jetkizildi. Qajettilik týyndaǵan jaǵdaıda PTR-testileý qýaty táýligine 60 myńǵa deıin jetkiziletin bolady.
«Osy jyldyń qazan aıynda 3 100 tósek-orynǵa arnalǵan 15 modýldik juqpaly aýrýlar aýrýhanasy paıdalanýǵa beriledi. Qajettilik týyndaǵan jaǵdaıda ınfektsııalyq tósek-oryndardyń sany qaıta beıimdeletin statsıonarlardy qosa alǵanda 51 myńǵa deıin keńeıtiledi. Medıtsınalyq kómektiń qol jetimdiligin keńeıtý, onyń ishinde aýyldyq jerlerdi de qamtý úshin qosymsha 100 jyljymaly medıtsınalyq keshen, 53 rentgen-apparaty, 2 700 ókpeni jasandy jeldetý apparaty, 64 ottegi stansasy satyp alynýda. Osy jyldyń qarashasyna deıin 807 jedel járdem kóligi jetkiziletin bolady», - dedi Asqar Mamın.
Qazirgi ýaqytta elimizde 3 180 adam koronavırýstan em qabyldaýda. Onyń ishinde 1 851 naýqas statsıonarlarda jatsa, 1 329 adam ambýlatorııalyq jaǵdaıda emdelýde. Jalpy naýqastardyń arasynda 86 adamnyń densaýlyq jaǵdaıy nashar dep baǵalanyp otyr. 14 naýqastyń ahýaly asa aýyr bolsa, 16 naýqas ókpeni jasandy jeldetý apparatymen tynys alyp jatyr.
Jalpy, búginde koronavırýs ınfektsııasyn juqtyrý jáne odan kelgen ólim boıynsha álemdik jaǵdaı kúrdeli kúıde qalyp otyr. Eýropa men Azııanyń birqatar memleketinde aýrýdy juqtyrý jaǵdaıy artyp barady. Máselen ótken aptada koronavırýsty juqtyrý jaǵdaıy Italııada, Germanııa, Belarýs, Túrkııa jáne Eýropanyń taǵy basqa elderinde baıqaldy. Reseıde indetti juqtyrý kórsetkishi 0,6-0,7 paıyzǵa ósti. Bul – Qazaqstandaǵy kórsetkishten qaraǵanda 10 ese kóp. Degenmen jaǵdaıdyń turaqty ekendigine qaramastan elimiz saqtyq sharalaryn qolǵa alyp, shetelden ushyp keletin jolaýshylardy PTR-test tapsyrǵany týraly anyqtamasy bolmasa statsıonarǵa jatqyzý týraly sheshim qabyldady. Máselen, búgin Almaty men Nur-Sultan qalalaryna kelgen jolaýshylardyń birazy statsıonarǵa ornalastyryldy.
