Koronavırýspen kúreske bólingen qarajattyń maqsatty paıdalanylýyn baqylaýǵa qatysty keńes ótti

NUR-SULTAN. QazAqparat - Qaýipsizdik Keńesiniń Apparatynda Qarjy mınıstri E.Q.Jamaýbaevtyń jáne Qarjy monıtorıngi komıtetiniń tóraǵasy J.Q.Elımanovtyń qatysýymen ekonomıkalyq qaýipsizdikti qamtamasyz etý máseleleri boıynsha keńes ótti, dep habarlaıdy QazAqparat Aqordaǵa silteme jasap.

Memleket basshysynyń koronavırýs ınfektsııasymen kúresýge bólingen bıýdjet qarajatynyń maqsatty jáne utymdy paıdalanylýyn baqylaýdy qamtamasyz etý, dárilik zattar men medıtsınalyq buıymdardyń zańsyz aınalymynyń jolyn kesý, sondaı-aq, qarjy pıramıdalaryna qarsy kúres jónindegi tapsyrmalaryn iske asyrýǵa erekshe nazar aýdaryldy.

Júrgizilgen tekserýlerdiń nátıjeleri boıynsha zańsyz aınalymnan 9,6 mln astam medıtsınalyq betperdeler, 65 myń lıtr antıseptık, 819 mln teńge somadaǵy túrli dárilik preparattardyń 388,2 myńnan astam oramasy alynyp, aýmaqtyq densaýlyq saqtaý organdaryna berildi.

Budan basqa, Qaýipsizdik Keńesi Tóraǵasynyń kóleńkeli ekonomıkaǵa qarsy kúrestiń keshendi tásilin uıymdastyrý jáne kóleńkeli aınalymdy qysqartý jónindegi tapsyrmasyn oryndaý máselesi qaraldy.

Osylaısha, kóleńkeli ekonomıkaǵa qarsy is-qımyl sheńberinde jalǵan shot-faktýralardy jazyp berý faktileri boıynsha anyqtalǵan qylmystardyń sany 2,5 esege artty (2019 jyldyń 6 aıynda 94-ten aǵymdaǵy jyldyń uqsas kezeńinde 242-ge deıin).

Atalǵan saladaǵy qylmystyń uıymdasqan túrlerimen kúres boıynsha belsendi jumys jalǵasýda. Mysaly Atyraý oblysynda sotqa uıymdasqan qylmystyq topqa qatysty qylmystyq is jiberildi, olar 1,8 mlrd teńgege jalǵan shot-faktýra shyǵarǵan.

Qabyldanǵan sharalardyń, onyń ishinde zańnamalyq sıpattaǵy is-áreketterdiń nátıjesinde qarajatty qolma-qol aqshaǵa aınaldyrý somasy bes jylda alǵash ret 36%-ǵa tómendedi.

Jumystyń taǵy bir mańyzdy baǵyty memleketke keltirilgen ekonomıkalyq zalaldy óteý bolyp tabylady. Birinshi jartyjyldyqta Qarjy monıtorıngi komıteti 743 qylmystyq isti tergedi, onyń 560-y máni boıynsha sotqa qaraýǵa joldandy.

Osy qylmystyq ister boıynsha anyqtalǵan zalal somasy 38,4 mlrd. teńgeni qurady, onyń shamamen 32 mlrd teńgesi memleketke keltirilgen zalal. Memleket kirisine 21,1 mlrd teńge óteldi, 9,6 mlrd teńgelik múlikke tyıym salyndy.

Taǵy bir basty baǵyt – qarjy pıramıdalarymen (29 qylmystyq is tirkelgen), zańsyz oıyn mekemelerimen (117 qylmystyq is, 160 oryn joıylǵan), sondaı-aq, jalǵan aqsha jasaýmen (161 is) kúres máselesi.

Sonymen qatar óz qatarlarynda sybaılas jemqorlyq kórinisteriniń jolyn kesý boıynsha jumys ózekti bolýda, ony turaqty formatta júrgizý qajet.

Keńes qorytyndysy boıynsha Prezıdentiniń kómekshisi – Qaýipsizdik Keńesiniń hatshysy Á.Ó.Isekeshev eldegi qalyptasqan áleýmettik-ekonomıkalyq ahýal jaǵdaıynda el basshylyǵynyń joǵaryda atalǵan tapsyrmalaryn iske asyrýdy erekshe baqylaýǵa alý qajettigin, bul rette adal kásipkerlerdiń quqyqtary men zańdy múddeleriniń qatań saqtalýyn qamtamasyz etý qajettigin atap ótti.