Koronavırýspen kúreske bólingen qarajat qaıda jumsalady - Birtanov jaýap berdi

NUR-SULTAN. QazAqparat - QR Densaýlyq saqtaý mınıstri Eljan Birtanov koronavırýspen kúreske bólingen qarajattyń qaıda jumsalatynyn aıtty, dep habarlaıdy QazAqparat tilshisi.

«Bul Densaýlyq saqtaý mınıstrliginiń emes, Úkimettiń qyzmettik paıdalaný rejimindegi qaýlysy. Shynymen de aıtyp berer edim, biraq oǵan meniń quqyǵym joq», - dedi mınıstr Úkimet otyrysy aldynda BAQ ókilderiniń saýalyna oraı.

Onyń atap ótýinshe, elimiz boıynsha aýqymdy dıagnostıka júriziletin bolady.

«Tolyqtaı alǵanda, qarajat betperde, kostıým, kózáınek, zararsyzdandyratyn quraldar, zerthana, teplovızorlar, dıagnostıkalaýǵa arnalǵan zerthanalyq jabdyqtar syndy qorǵanys zattaryn satyp alýǵa jumsalatyndyǵyn aıta alamyn. Sebebi aýqymdy dıagnostıka júrgiziledi. Dárigerlerden bólek, shekarashylarǵa arnalǵan da bar. Al bul qyzmettik aqparat», - dedi mınıstr.