Koronavırýspen kúreske bólingen 2,5 mln teńgeni jymqyrǵandar sottaldy
«2020 jyldyń 28 qyrkúıeginde Almaty oblysy Іle aýdandyq sotynyń úkimi shyqty. Ol boıynsha Almaty oblysynyń Densaýlyq saqtaý basqarmasyna qarasty oblystyq jedel jáne shuǵyl medıtsınalyq járdem stantsııasynyń dırektory K.Z. Qaldybaevqa 30 240 930 teńge kóleminde aıyppul salyndy. Al sol mekemeniń bas ınjeneri D.I. Týǵambaevtyń 3 jyl 6 aı merzimge bas bostandyǵy shekteldi», - dedi Sybaılas jemqorlyqqa qarsy is-qımyl agenttiginiń 1-shi departamentiniń asa mańyzdy ister jónindegi tergeýshisi Danııar Bekaıdarov onlaın brıfıng barysynda.
Agenttik ókiliniń habarlaýynsha buǵan deıin olar «Densaýlyq» baǵdarlamasy boıynsha bólingen 2,55 mln teńge somasyndaǵy bıýdjet qarajatyn aldyn ala sóz baılasý boıynsha urlady dep kúdiktelgen. Qarajat koronavırýs (COVID-19) pandemııasymen kúres úshin daǵdarysqa qarsy sharalar aıasynda aýdarylǵan.