Koronavırýspen kúreske atsalysqan ShQO turǵyndary marapattaldy
Aımaq basshysy Danıal Ahmetov barlyq sanıtarlyq talaptardy saqtaı otyryp, koronavırýs ınfektsııasymen kúresýge atsalysqan iri kásiporyn basshylaryna «Halyq alǵysy» medalin tabys etti.
«Prezıdentimiz Qasym-Jomart Kemeluly indetpen kúreste elimizdegi iri kásiporyndardyń alatyn orny erekshe ekenin atap ótken. Sizder álemdi ábigerge salǵan koronavırýs pandemııasy kezinde jurt ıgiligine qyzmet etip, qaısarlyq pen meıirimdiliktiń naǵyz úlgisin kórsetip, halyqtyń ystyq yqylasy men shyn qurmetine ıe boldyńyzdar. Óńirdegi epıdemıologııalyq jaǵdaıdy turaqtandyrý jolynda belsendilik tanytqandaryńyz úshin alǵys bildiremin», - dedi Danıal Ahmetov.
Shyǵys Qazaqstan oblysynda COVID-19 ınfektsııasynyń birinshi tolqynynda óńirdiń iri kásiporyndary barynsha qoldaý kórsetip, jaǵdaıdy turaqtandyrýǵa súbeli úlesterin qosty. Atap aıtqanda, «Aitas» AQ kásiporny Semeı, Óskemen qalalarynda PTR-zerthanalaryn ashyp, dári-dármek, zalalsyzdandyrý quraldarymen qamtamasyz etti.
«Pandemııa kezinde óz kompanııamyzdyń atynan 600 mln teńge bólý týraly sheshim qabyldadyq. Sonyń arqasynda respýblıkanyń 4 qalasynda PTR-zerthanalar ashtyq. Osyndaı qysyltaıań shaqta halyqqa kómektesý - basty mindetimiz. Sondyqtan qolymyzdan kelgenshe kómek qolyn sozýǵa tyrystyq», - dedi «Aitas» AQ bas dırektory Serik Tolyqpaev.
Respýblıka kóleminde medıtsınalyq maskalardyń tapshylyǵy kezinde Shyǵys Qazaqstan betperdelerdi tigý isin qolǵa alǵan edi. Mıllıondaǵan dana tapsyrysty der kezinde tigip, turǵyndardy sapaly ónimmen qamtamasyz etken «SemSpetsSnab» JShS eńbegi de búgin eleýsiz qalmady.
«Bizdiń kásiporynda 300-ge jýyq adam jumys isteıdi. Onyń basym kópshiligi áıelder. Pandemııanyń alǵashqy tolqynynda olar kún-tún demeı betperdeler tikti. Biz indet bastalǵaly barlyǵy 2,5 mln-ǵa jýyq maska daıyndadyq», - dedi «SemSpetsSnab» JShS dırektory Aınur Qabdylqyzy.
Aıta keteıik, Qazaqstan Respýblıkasy Prezıdentiniń Jarlyǵymen densaýlyq saqtaý, áleýmettik qorǵaý, sondaı-aq pandemııaǵa qarsy kúrestegi jemisti jumysy úshin 100 jýyq shyǵysqazaqstandyq «Halyq alǵysy» medalimen marapattalǵan.
