Koronavırýspen kúres: Vaktsınanyń ekinshi partııasyn jetkizý bastaldy
NUR-SULTAN. QazAqparat - Epıdemıologııalyq jaǵdaıdyń matrıtsasyna sáıkes, Qazaqstan Respýblıkasy sońǵy eki apta boıy «jasyl» aımaqta tur. Qaýipti - «qyzyl» aımaqta turǵan óńir joq. «Sary» aımaqta – 5 óńir, ıaǵnı Batys Qazaqstan, Qostanaı, Aqmola, Pavlodar oblystary jáne Nur-Sultan qalasy bar. Qalǵan 11 óńir «jasyl» aımaqta ornalasqan.
Búgin ortalyq kommýnıkatsııalar qyzmetinde QR Densaýlyq saqtaý vıtse-mınıstri, bas memlekettik sanıtarlyq dáriger Erlan Qııasov koronavırýsqa qarsy vaktsınalaý naýqanyna qatysty túsinik berdi.
«Koronavırýs ınfektsııasyna qarsy vaktsınalaý jalǵasyp jatyr. Qazirgi kezde birinshi komponentpen 20 157 adam egildi. 22 aqpannan bastap ekinshi komponentpen vaktsınalaý bastalyp, 2 137 adamǵa ekpe jasaldy, qolaısyz kórinister tirkelgen joq», - dedi E. Qııasov.
Onyń aıtýynsha, 23 aqpannan Qaraǵandy farmatsevtıkalyq kesheniniń bazasynda óndirilgen 93 myń doza mólsherindegi vaktsınanyń ekinshi partııasyn jetkizý bastaldy. Osy vaktsınamen medıtsına qyzmetkerlerin egý aıaqtalǵan soń, pedagogtardy vaktsınalaýdy bastaý josparlanyp otyr.
«Vaktsınalaý barlyq óńirlerde júrgizilip jatyr. 786 egý pýnkti ashyldy, olardyń 170-i qazirgi ýaqytta egý jumystaryn júrgizip otyr. Barlyǵy salqyndatý tizbegin qamtamasyz etý úshin qajetti jabdyqtarmen qamtamasyz etilgen. 9 myńnan astam medıtsına qyzmetkeri oqytyldy», - dedi vıtse-mınıstr.
Onyń sózine qaraǵanda, qazirgi kezde jrǵaryda atalǵan toptarǵa ekpe jasalyp jatyr. Sáýir aıyna qaraı ekpe óndirý kólemi artady dep josparlanǵan. Naýryz aıynda vaktsına óndirý aıyna 160 myń dozaǵa deıin jetkiziledi, al sáýirde 600 myń dozaǵa deıin bolady. Tıisti toptar ekpemen qamtylǵannan keıin, sáýir aıynyń sońyna qaraı ekpe saldyrýǵa nıet bildirgender naryqtaǵy qoljetimdi vaktsınany qoıdyrady.
Sonymen qatar ol naýryz aıynda pedagogtardy jáne kúsh- qurylymdardyń qyzmetkerlerine ekpe saldyrý bastalatynyn aıtty.
«Sáýirde birtindep vaktsına saldyrýǵa daıyn halyqtyń basqa da bólikterine aýysamyz», - dedi vıtse-mınıstr.
Ortalyq kommýnıkatsııalar qyzmetindegi baspasóz máslıhatynda Úkimet músheleri men depýtattarǵa vaktsına saldyrý qashan bastalatyny suraldy.
«Olar memlekettik qyzmetshilermen birdeı vaktsınalaýmen qamtylady. Bul kezeń medıtsına qyzmetkerlerin, pedagogtardy, áskerılerdi tolyqqandy vaktsınalaǵannan keıin júrgiziledi. Sonymen qatar memlekettik qyzmetshilerdi vaktsınalaý eskeriledi», - dedi E. Qııasov.
Olar qoljetimdi vaktsınamen qamtylmaq. Ekpe saldyrý qarqynyn eskersek, memlekettik qyzmetshilerge «Spýtnık V» vaktsınasy salynady. Tizim boıynsha shamamen naýryzdyń sońy men sáýir aıynyń basynda iske asyrylady.
Belgili bolǵandaı, 65 jastan asqan adamdardy vaktsınalaýǵa qatysty óndirýshiniń resmı aqparatynyń negizinde, medıtsınalyq qarsy kórsetilimderin (sozylmaly aýrýlardyń, allergııalyq reaktsııalardyń jáne ózge de qarsy kórsetilimderdiń bolýy) eskere otyryp, osy jas erekshelik sanatyndaǵy adamdardy vaktsınalaýǵa ruqsat berý týraly sheshim qabyldandy. QR Bas memlekettik sanıtarlyq dárigeriniń tıisti qaýlysyna qol qoıyldy.
KVI-diń «brıtandyq» shtamy
QR DSM Medıtsınalyq jáne farmatsevtıkalyq baqylaý komıteti Dárilik zattar men medıtsınalyq buıymdardy saraptaý ulttyq ortalyǵynyń sarapshysy Nurshaı Ázimbaeva elimizde koronavırýstyń «brıtandyq» shtamy tirkelmegenin aıtty.
«Álem boıynsha koronavırýs ınfektsııasy shtamdaryn, olardyń mýtatsııasyn zerttep, qadaǵalap otyrmyz. Elimiz boıynsha ulttyq saraptama ortalyǵy bar. Ortalyq elde tirkelgen koronavırýs ınfektsııasynyń shtamdaryn qarap, tekseredi. Osynyń nátıjesinde, «brıtandyq» shatamm elimizdiń aýmaǵynda tirkelmedi», - dedi N. Ázimbaeva.
Sonymen bul baǵyttaǵy jumystar jalǵasyp jatqanyn jetkizdi.
Budan bólek Erlan Qııasov karantın shekteýlerin jeńildetý turǵysynda nysandardyń ashylýyna pikir bildirdi.
«Búgin vedomstvoaralyq komıssııada karantın is-sharalaryn jeńildetý boıynsha birqatar qadam týraly aıtyldy. Jaqyn arada ózgerister engizý týraly qaýly qabyldanady. KVI-diń taralýynyń tómendeýine qatysty ońtaıly jaǵdaı aldaǵy ýaqytta qyzmettiń túrli salalaryndaǵy shekteýlerdi birtindep toqtatýǵa yqpal etedi dep úmittenemiz. Sonymen qatar halyqty vaktsınalaýdy sátti ótkizýge erekshe senim artyp otyrmyz», - dedi vıtse-mınıstr.
Bas sanıtar dáriger budan buryn pessımıstik esepteýler boıynsha indettiń órshý múmkindigi naýryzdyń sońy men sáýirdiń basyna qarastyrylǵanyn aıtty.
«Qazirgi jaǵdaıdy eskere otyryp, osyǵan deıin belgilengen qaýip seıilgenin baıqaýǵa bolady. Qazirgi kezde jaǵdaı optımıstik stsenarıı boıynsha qalyptasyp keledi», - dedi ol.
Sonymen qatar vıtse-mınıstr byltyrǵy jaz aılaryndaǵydaı indettiń órshýi bolmaýy úshin tıisti jumystar atqarylǵanyn jetkizdi.
«Koronavırýs ınfektsııasynyń taralýyn shekteýge baǵyttalǵan qadamdar tıisti oń nátıjesin berdi dep úmittenemiz. Sondyqtan ótken jyldaǵy ahýal qaıtalanbaıdy dep sanaımyz», - dedi Erlan Qııasov.
Aıta keteıik, QR Premer-Mınıstriniń orynbasary Eraly Toǵjanov tóraǵalyq etken koronavırýs ınfektsııasynyń taralýyna jol bermeý jónindegi vedomstvoaralyq komıssııanyń otyrysynan keıin 1 naýryzdan bastap karantındi jeńildetý qadamdary belgili boldy.
Osy oraıda 7 kún boıy «sary aımaqta» bolǵan óńirlerde bıylǵy jyldyń 1 naýryzynan bastap jabyq bazarlardyń (azyq-túlik, azyq-túlik emes), saýda jáne oıyn-saýyq ortalyqtarynyń, saýda úıleriniń, saýda jelileriniń jeksenbi kúnderi jumys isteýine ruqsat etiledi.
Monıtorıngtik tekserý qorytyndysy boıynsha bilim berý uıymdarynda sanıtarlyq-epıdemıologııalyq talaptardyń buzylý faktileri kóp tirkelgen Mańǵystaý, Qostanaı jáne Jambyl oblystaryn qospaǵanda, barlyq oblystarda bıyldyń 1 naýryzynan bastap 1-5 synyptardyń, halyqaralyq mektepterde 1-7 synyptardyń oqýshylaryn aralas oqytýǵa ruqsat etiledi.
