Koronavırýspen kúres: UBT-da túlekter arasynda 2 metr qashyqtyq saqtalady

NUR-SULTAN. QazAqparat - Koronavırýs pandemııasyna baılanysty bıylǵy UBT-da sanıtarlyq shekteý sharalary qolǵa alynady, dep habarlaıdy QazAqparat tilshisi.

Bul týraly QR Bilim jáne ǵylym mınıstrliginiń Ulttyq testileý ortalyǵynyń dırektory Dıdar Smaǵulov málimdedi.

«Testileý merzimi ázirge ózgerissiz qalyp otyr. Ony maýsymnyń 22-sinde bastaımyz dep josparlap otyrmyz. Eger pandemııa saldarynan jaǵdaı ózgerer bolsa, bul merzimdi qarastyryp, taǵy eki aptaǵa sozýymyz múmkin», - dedi Dıdar Smaǵulov QazAqparat tilshisine bergen jaýabynda.

Sonymen birge, bıylǵy testileýde túlekterdiń dene qyzýyn ólsheý, aýdıtorııadaǵy adam sanyn azaıtý syndy qaýipsizdik sharalary qarastyrylady.

«Testileýde ádette bir aýdıtorııada 100-150 adam otyratyn. Qazir 50 adamnan otyrǵyzýdy uıǵardyq. Epıdemıologııalyq jaǵdaı qıyndasa, 30 adamnan, tipti 25 adamnan qaldyramyz. Ár túlektiń aınalasynda 2-2,5 metr qashyqtyq saqtalýy kerek. Ol úshin aýdandarda ǵımarat jetkilikti, barlyǵyn eseptep shyqtyq. Esh qıyndyq bolmaıdy», - dedi D. Smaǵulov.

Buǵan deıin Dıdar Smaǵulov UBT-ǵa 11-synyptyń tórtinshi toqsanynan jańa suraqtar bolmaıtynyn túsindirgen edi.