Koronavırýspen kúres sharalaryn qaıta qaraý kerek – Prezıdent
«Jalǵasyp jatqan pandemııa jaǵdaıyndaǵy damýǵa kelsek, 1,5 jyl boıy koronavırýs progresti tejeýde. Jańa shtamdar tolqyny koronavırýstyń bizdiń ómirimizge dendep engenin kórsetedi. Biz oǵan beıimdelip, osyndaı jaǵdaıda ómir súrýdi úırenýimiz kerek. Bul eń aldymen shekteý sharalary men memleket ómiri arasyndaǵy tekserilgen syndarly teńgerimdi izdeýdi bildiredi. Pandemııamen kúres paradıgmasy kóz aldymyzda ózgerip jatyr. Qazir de kóptegen elder vırýstyń taralýyn nólge deıin tómendetýdi maqsat etpeıtin boldy», - dedi Prezıdent Úkimettiń keńeıtilgen otyrysynda.
Onyń aıtýynsha, qazirgi ózekti mindet – ınfektsııanyń iri oshaqtaryn azaıtý jáne densaýlyq saqtaý júıesiniń shamadan tys júktemesine jol bermeý.
«Biz vırýsqa qarsy is-áreket sharalaryn túbegeıli qaıta qarap, sapaly jańa strategııa ázirleýimiz kerek. Jańa shtammdar tipti vaktsına alǵandarǵa da juǵatynyna kóz jetkizdik. Alaıda ımmýndaý jumystary aýrýdy jeńildetedi jáne ólim qaýpin azaıtady. Osyǵan negizdelý kerek. Vırýs juqtyrǵandar boıynsha statıstıkalyq derekter shara qabyldaý úshin jalǵyz negiz bolmaýy kerek. Basty nazardy aýyr jaǵdaılar men ólim-jitimdi azaıtýǵa jáne kúrdeli naýqastardy emdeýge aýdarý qajet», - dep túıindedi Prezıdent.
Buǵan deıin Prezıdent antıvakserlerdiń qaýeset, dańǵaza áńgimelerine senýdiń qajeti joq degen edi.
