Koronavırýspen kúres: Pandemııada volonterler qalaı jumys istedi

NUR-SULTAN. QazAqparat – Qazaqstanda volonterlik uıymdar men toptardyń sany 3 esege artty jáne 180 myń turaqty volonterler jumys isteıdi. Bul týraly QR Aqparat jáne qoǵamdyq damý mınıstrligi Azamattyq qoǵam isteri komıtetiniń tóraǵasy Madııar Qojahmet aıtyp berdi, dep habarlaıdy QazAqparat tilshisi.

«Ózderińiz biletindeı, 2020 jyl Memleket basshysy Qasym-Jomart Toqaevtyń bastamasymen «Volonter jyly» dep jarııalandy. Volonter jyly Táýelsiz Qazaqstan tarıhyndaǵy basty jáne mańyzdy oqıǵa boldy jáne is júzinde volonterlik sóziniń basymdyǵyn dáleldedi. Volonterlik bizdiń azamattarymyzdyń bir-birine baýyrmaldyq, basqalarǵa jáne jalpy týǵan eldiń taǵdyry úshin jeke jaýapkershilik sezimin oıatyp, úlken nátıjelerge jetkizdi. Bir kúntizbelik jyl ishinde volonterlik qyzmetke qatysatyn azamattar men uıymdar sanynyń turaqty ósip, iske asyrylatyn baǵdarlamalar men jobalar aýqymynyń arta túskenin kórip otyrmyz», - dedi Madııar Qojahmet Ortalyq kommýnıkatsııalar qyzmetinde ótken baspasóz máslıhatynda.

Osy ýaqyt ishinde volonterlik uıymdar men toptardyń sany 3 esege artyp, 600-den astam uıymdar qurylǵan. Turaqty volonterler sany birneshe ese ósken jáne búginde 180 myńnan astam adamdy quraıdy.

«Búgin de volonterlik búkil álemdi dúr silkindirgen pandemııa qaýpine qarsy turatyn mańyzdy faktorlardyń biri bolǵanyn senimmen aıta alamyz. Osy qıyn kezeńde elimizde volonterlik iske 500 myńnan astam adam tartyldy, bir mıllıonnan astam azamatqa ártúrli kómek kórsetildi», - dep atap ótti spıker.

Spıkerdiń aıtýynsha, volonterlikti damytýdaǵy eń mańyzdysy – memleket pen qoǵamnyń birge jumys isteýi.

«Birinshiden, «Birgemiz» volonterlerdiń respýblıkalyq front-ofısi jáne onyń 17 óńirlik ofıster sıpatynda volonterlik qozǵalysty damytý úshin ınfraqurylym quryldy. Bul barlyq volonterlik uıymdar men toptaryn biriktirýge múmkindik berdi. Sonymen birge, volonterlik salasyndaǵy jańalyq dep QazVolunteer.kz biryńǵaı platformasyn ataýǵa bolady. Búgingi tańda 47 myńnan astam volonter men 3 myńnan astam uıymdy biriktirgen biryńǵaı aqparattyq resýrs alýan túrli jobalarǵa uıytqy boldy», - deıdi M. Qojahmet.

Ekinshiden, «Birgemiz» jalpyulttyq jobasy aıasynda 7 baǵyt boıynsha (Sabaqtastyq, Saýlyq, Taza álem, Asyl mura, Qamqor, Bilim, Úmit) volonterliktiń tutas júıesi qalyptasqan. Atalǵan baǵdarlamalar 7 myńnan astam volonterdi qamtyp, volonterler qozǵalysynyń aıqyndaýshy vektory boldy.

Azamattarǵa keńes berýge 3,5 myńnan astam volonter – zańgerler, advokattar, notarıýstar jáne zań fakýltetteriniń stýdentteri qatysyp, olardan 7,5 myń adam keńes alǵan.