Koronavırýspen kúres: Qyzylordada dári-dármek qory jetkilikti
QYZYLORDA. QazAqparat - Qyzylorda oblysynda koronavırýspen kúres baǵytynda halyqqa qajetti dári-dármek qory bar, dep habarlaıdy QazAqparat tilshisi.
Búginde óńir dárihanalarynda halyqqa qajetti dárilik zattar jetkilikti. Monıtorıng top medıtsınalyq buıymdardyń bar-joqtyǵyna únemi baqylaý júrgizýde. Sondaı-aq, tekserý barysynda shekti baǵadan asyp satylǵan dárilik zattardyń 72 ataýy anyqtaldy.
«Shekti baǵasynan asyp ketý deregi boıynsha 33 ákimshilik is qaralyp, olarǵa 5,2 mln teńge aıyppul salyndy. Al dárilik zattardy zańsyz satý deregi boıynsha 17 tulǵa ákimshilik jaýapqa tartylyp, aıyppul arqalady. Munan ózge, zańsyz aınalymnan 448 dárilik zat jáne 36 medıtsınalyq buıym tárkilendi», - dedi oblystyq medıtsınalyq jáne farmatsevtıkalyq baqylaý departamentiniń bólim basshysy Nurbek Ádilhanov.
Departament tarapynan óńirdegi kóterme dıstrıbıýtorlar men dárihanalarda neǵurlym suranysqa ıe dárilik zattar men medıtsınalyq buıymdardyń bolýyna monıtorıngti turaqty jasap otyr. Sol arqyly bıylǵy jylǵy 15 shilde men 23 jeltoqsan aralyǵynda kóterme saýda qoımalary men dárihanalarda dárilik zattar qory birshama artty.
«Atap aıtqanda, antıbıotıkter 2,3, vırýsqa qarsy preparattar 2,4, jáne antıkoagýlıanttar 2,4, ystyqty túsiretin preparattar 3,7, medıtsınalyq maskalar 1,5 ese kóbeıdi. Osy maqsatta bólingen qarjyǵa ystyq túsiretin, antıbıotıkter, vırýsqa qarsy, ımmýnostımýlıatorlar, medıtsınalyq buıymdar, ınektsııalyq jáne gormondyq preparattar satyp alyndy», - dedi N.Ádilhanov.
Sondaı-aq, Qyzylordada koronavırýs juqtyrǵan naýqastardyń 98,4 paıyzy tolyǵymen jazyldy.
