Koronavırýspen kúres: qosymsha 14,5 mln shprıts satyp alynady

NUR-SULTAN. QazAqparat – Qosymsha 14,5 mln shprıts satyp alynady. Bul týraly búgin Úkimet otyrysynda QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

«Osy jyldyń aqpanynda vedomstvoaralyq komıssııanyń sheshimimen COVID-19-ǵa qarsy halyqty ımmýndaýdyń keshendi jospary bekitildi. Vaktsınany óndirý jáne jetkizý GMP men GDP barlyq standarttaryn, sonymen qatar «sýyq tizbekti» saqtaı otyryp júrgizilýde», - dedi Alekseı Tsoı.

Onyń atap ótýinshe, KVI-ge qarsy vaktsınatsııalaý máseleleri boıynsha 9 myńnan astam medıtsına qyzmetkeri oqytyldy. 600-den astam vaktsınatsııalaý kabıneti, 800 tońazytqysh jabdyǵy men 3 myń termokonteıner daıyndaldy. Naýryz aıynyń sońyna deıin 300 myń azamatqa vaktsınatsııa qoljetimdi boldy jáne 11,3 mln shprıts satyp alyndy.

«Joǵaryda aıtylǵan vaktsınanyń qosymsha jetkizilimine jáne egý pýnktterin ashý qajettiligine oraı biz taǵy 14,5 mln dana shprıts satyp alý jumysyn júrgizip jatyrmyz», - dedi mınıstr.