Koronavırýspen kúres kezinde alaıaqtar áleýmettik jelilerde belsendi

NUR-SULTAN. QazAqparat – Koronavırýs indetiniń taralýy kezinde kıberqylmyskerler jeli paıdalanýshylaryna ınfektsııamen kúresýge qaıyrymdylyq jasaýdy usynýda. Bul týraly Qazaqstan Respýblıkasynyń Qarjy naryǵyn retteý jáne damytý agenttigi málim etti, dep habarlaıdy QazAqparat.

«Kıberqylmyskerler de jeli paıdalanýshylaryna ınfektsııamen kúresýge qaıyrymdylyq jasaýdy usynady jáne Dúnıejúzilik densaýlyq saqtaý uıymnyń hattaryn jiberedi, sonymen qatar tólem kartalarynyń derekterin alady. Alaıaqtar Facebook, Instagram jáne Telegram sııaqty áleýmettik jelilerde alaıaqtyq bottardy quryp, jeli paıdalanýshylarymen hat almasýǵa kirisip, olardyń senimine ıe bola otyryp, belsendilik tanytady», - delingen habarlamady.

Bul turǵyda alaıaqtar paıdalanýshynyń derbes derekterin bilip alý maqsatynda ártúrli qýlyqqa barady. Bul degenimiz, JSN, tólem kartasynyń nemese shottyń derekteri, SMS-habarlamanyń kody jáne tipti elektrondyq tsıfrlyq qoltańbany (ETsQ) qamtýǵa tyrysady.

«Ózderiniń derbes derekterin, onyń ishinde ETsQ-ny usyna otyryp, kartadaǵy nemese shottaǵy barlyq qarajattyń qolma-qol aqshaǵa aınalýy, sizdiń atyńyzǵa kúmándi sharttar resimdelýi, ıaǵnı múliktiń qaıta resimdelýi nemese bógde adamdardyń sizdiń páterde tirkelýi qaýpi bar», - dep atap ótilgen agenttik málimetinde.

Osy oraıda mamandar kúdikti ınternet-resýrstarda tirkeýden ótýdiń jáne belgisiz adamdarǵa óziniń jeke derekterdi berýdiń qajeti joq ekenin atap ótýde.

«Búkil álemde beleń alyp jatqan qarjylyq alaıaqtyqtyń kezekti túri – bul jalǵan saýalnamalar jáne basqa da aqyly tapsyrmalary bar alaıaqtyq saıttar. Halyq arasynda aqy tólenetin saýalnamalar júrgizetin bul saıttar, shyn máninde, áleýmettik jobalar qatysýshylaryna aqsha tólemeıdi. Mundaı saıttardyń shemalary shamamen birdeı. Azamattarǵa saıtta tirkeýden ótip, birneshe aqyly saýalnamaǵa jaýap berý usynylady», - deıdi mamandar.