Koronavırýspen kúres: Qazaqstan dárigerleri tájirıbe almasýǵa Qytaıǵa barady
«Qytaılyq áriptestermen tyǵyz baılanysta boldyq. Jalpy, indetpen kúreste sizderge jáne Qazaqstannyń dárigerlerine alǵys aıtqym keledi. Medıtsına qyzmetkerlerimiz álemdik tájirıbeni zertteýge ashyq, Dúnıejúzilik densaýlyq saqtaý uıymymen de jumys isteýdemiz. Búginde ǵylymı medıtsına bar, sáıkesinshe, tek ǵylym negizinde úzdik tájirıbelerdi zerttep, engizýimiz kerek. Sondyqtan Qytaıdan kelgen dárigerlerdiń ozyq tájirbelerin zertteýdiń múmkindigi boldy», - dedi E. Birtanov.
Osy oraıda mınıstr QHR dárigerleriniń tájirıbe almasý úshin kelgen sapary bul saladaǵy yntymaqtastyqty nyǵaıtýǵa tyń serpin beretinin aıtty. Sonymen qatar, elimizde koronavırýspen kúres sharalaryna jumyldyrylǵan dárigerlerdiń Qytaıǵa saparyn uıymdastyrýdyń mańyzdylyǵy atap ótildi.
Bul turǵyda Eljan Birtanov bul bastamany dıplomatııalyq jolmen pysyqtaý kerektigin jetkizdi.
«Meniń oıymsha, bul baǵyttaǵy tájirıbe almasý sharalary óte mańyzdy bolady. Koronavırýspen kúresti tıimdi júrgizý úshin atalǵan usynysty pysyqtaýdy suraımyn. Qajet bolǵan jaǵdaıda, Qytaıdyń Densaýlyq saqtaý mınıstrine tıisti hatty joldaýǵa ázirmin», - dedi vedomstvo basshysy.
Onlaın-konferentsııa sońynda E. Birtanov QR Densaýlyq saqtaý mınıstrligi atynan elimizde koronavırýs ınfektsııasymen kúresýge qosqan zor úlesi úshin qytaılyq delegatsııaǵa alǵys aıtty. Osy oraıda kórshi eldiń dárigerleri «QR Densaýlyq saqtaý isine qosqan úlesi úshin» tósbelgisimen marapattaldy.
Esterińizge sala keteıik, 9 sáýir kúni Qytaıdyń Shyńjan-Uıǵyr avtonomııalyq ólkesinen dárigerler Qazaqstan astanasyna keldi.
Qytaıdan arnaıy kelgen 10 dárigerdiń arasynda pýlmonolog, epıdemıolog mamandar, qoǵamdyq densaýlyq saqtaý sarapshylary bar. 15 kúndik saparda olar koronavırýs ınfektsııasyn juqtyrǵandardy dıagnostıkalaý, emdeý jáne qoǵamdyq densaýlyq saqtaý máselelerin talqylady.