Koronavırýspen kúres: Qasym-Jomart Toqaev Atyraý oblysyna birqatar tapsyrma berdi
NUR-SULTAN. QazAqparat –Atyraý oblysynda vahtalyq tásilmen isteıtin jumysshylardyń densaýlyǵyn muqııat qadaǵalaý qajet. Bul týraly búgin Atyraý oblysynyń áleýmettik-ekonomıkalyq damý máseleleri jónindegi keńeste Memleket basshysy Qasym-Jomart Toqaev aıtty, dep habarlaıdy QazAqparat tilshisi.
«Koronavırýs indeti qaıtadan órship, epıdemıologııalyq ahýal kúrdelenip barady. Bul rette, aımaqtyń ereksheligin eskerip, eńbek ujymdaryndaǵy ahýalǵa aıryqsha nazar aýdarý kerek. Oblys kásiporyndarynda apta saıyn indet oshaǵy paıda bolýda. Oblys ákimine iri óndiristik kásiporyn basshylarymen birlesip, indettiń aldyn-alý jáne onymen kúres sharalaryn ýaqtyly qabyldaýdy tapsyramyn. Vahtalyq tásilmen isteıtin jumysshylardyń densaýlyǵyn muqııat qadaǵalaý qajet», - dedi QR Prezıdenti.
Memleket basshysynyń atap ótýinshe, indettiń jańa tolqyny kelgennen beri jaǵdaıy aýyr jáne óte aýyr naýqastar kóbeıýde. Olardyń sany sońǵy bir aıda eki esege artty. Al, emdeý mekemelerinde qajetti dári-dármek pen qural jabdyqtar áli de jetkiliksiz ekeni anyqtalyp otyr. Bul ahýal adam óliminiń kúrt ósýine ákep soqtyrýy múmkin.
«Bilikti mamandardyń tapshylyǵy da jaǵdaıdy ýshyqtyryp otyr. Oblysta 207 dáriger jetispeıdi. Sonyń ishinde, aýyldyq jerlerge 52 dáriger qajet. Oblys ákimine emdeý mekemelerin dári-dármekpen jáne medıtsınalyq quralmen qamtamasyz etýdi jeke baqylaýǵa alýdy tapsyramyn. Sonymen qatar, anestezıologııa jáne jan saqtaý bólimderin tolyq jabdyqtaýdy, dárigerler tapshylyǵy máselesin sheshý mindetin júkteımin», - dedi Qasym-Jomart Toqaev.
