Koronavırýspen kúres: Aqtaýda qaıtys bolǵan áskerı qyzmetshi marapattaldy

AQTAÝ. QazAqparat - Aqtaý garnızonynda áskerı boryshyn oryndaý kezinde qaza tapqan aǵa serjant Joldasjan Ereshbaevti marapattaý rásimi ótti. Bul týraly QR Qorǵanys mınıstrliginen málim etti, dep habarlaıdy QazAqparat tilshisi.

J.Ereshbaev bıylǵy 25 naýryzdan bastap koronavırýs ınfektsııasymen kúreste aldyńǵy qatarda boldy.

«Aǵa serjant óziniń áskerı bóliminde dezınfektsııalyq toptyń quramyna kirip, Aqtaý qalasynyń aýmaǵyn óńdeýmen aınalysty. Basqa áriptesteri sııaqty óńdeý jumystaryn kún saıyn jasady. Alaıda, qaýipsizdik sharalaryna qaramastan, vırýspen kúresýge qatysqan áskerı qyzmetshi naýqastanyp, 24 sáýirde COVID-19-dan qaıtys boldy», - dedi Qorǵanys mınıstrliginen.

Eske alý rásimi barysynda QR QK Bas shtaby bastyǵynyń orynbasary Serik Borambaev aǵa serjantty «El qorǵany» medalimen marapattaý týraly Qorǵanys mınıstriniń buıryǵyn oqydy. Áskerı qyzmetshiniń marapaty onyń jubaıyna tabystaldy. Marqumnyń artynda 5 perzenti qaldy.

«Marqumnyń áriptesteriniń aıtýynsha, ol qyzmette óz isiniń laıyqty mamany bolǵan. Árqashan joǵary jaýapkershilikpen jáne tártiptilikpen erekshelenip, jaýyngerlik daıarlyqta jaqsy nátıjeler kórsetken. Dostary men tanystary ony basqalarǵa janashyr, qamqor adam retinde eske alady», - dedi mınıstrlikten.