Koronavırýspen aýyrǵandardyń jartysy sımptomsyz jaǵdaıda saýyǵady
NUR-SULTAN. QazAqparat – Áýe kóligi jolaýshylary úshin aqyly testileý sharalary óziniń nátıjesin berip jatyr. Bul týraly Densaýlyq saqtaý mınıstri Eljan Birtanov málim etti, dep habarlaıdy QazAqparat tilshisi.
«Ushaqpen saparlaýdy tańdaǵan jolaýshylar arasynan aýrýdyń jasyryn belgileri anyqtaldy. Sondyqtan testileý sharalary kerek dep sanaımyz. Keshe bir jaǵdaı tirkeldi. Aqyly testileý aıasynda osy aptada 10-ǵa tarta indet juqtyrǵan adamdy anyqtadyq», - dep atap ótti E. Birtanov «Habar24» arnasyna bergen suhbatynda.
Onyń sózine qaraǵanda, táýligine elimiz boıynsha 15 myń test jasalady. Testileý nátıjesinde ınfektsııanyń taralyp jatqandyǵy kórinip otyr.
Statıstıka kórsetip turǵandaı, 85 paıyzy – ol jeńil jáne sımptomsyz jaǵdaı.
«Barsha aýrýlardyń jartysyna jýyǵy - sımptomsyz. Bul adamdar aýyrmaıdy, ózderi emdeledi. Alaıda olar aýrýdy basqa adamdarǵa juqtyrýy múmkin», - dedi E. Birtanov.
