Koronavırýspen aýyrǵandardy qandaı dári-dármektermen emdep jatyr
NUR-SULTAN. QazAqparat – Búgingi tańda elimizde koronavırýsty emdeý úshin «Gıdroksıhlorohın» dárisi qoldanylady. Bul týraly Ortalyq kommýnıkatsııalar qyzmetinde ótken eldegi koronavırýstyq ınfektsııa boıynsha aǵymdaǵy jaǵdaı, sonymen qatar Qazaqstandaǵy vaktsınalardyń sapasy men satyp alýlary týraly brıfıngte aıtyldy, dep habarlaıdy QazAqparat tilshisi.
«Búgingi tańda Qazaqstanda Covid-19-dy emdeý protokolyna sáıkes enterovırýsty preparattardan bastap antıbıotıkterge deıin birqatar preparat qoldanylady. Olar óz nátıjeliligin kórsetti. Atalǵan dári-dármekterdiń bári Dúnıejúzilik densaýlyq saqtaý uıymynyń usynymymen alyndy. Apta saıyn jańa dári-dármek qosylyp, keıbiri qoldanystan alynyp jatady», - deıdi DZSUO Bas dırektory, Basqarma tóraǵasy Arnur Nurtaev.
Onyń aıtýynsha, búgingi tańda elimizde koronavırýsty emdeý úshin «Gıdroksıhlorohın» dárisi qoldanylady.
«Bul preparat aýyryp jatqandardyń belgili bir tobyna jaqsy áser etýde. Bári de ony durys taǵaıyndap, durys mólsherde qoldanýǵa baılanysty», - deıdi ol.
