Koronavırýspen aýyrǵandar sany artqan jaǵdaıda tósek-oryn qory jetkilikti me
NUR-SULTAN. QazAqparat – Respýblıkada 28 730 tósek-oryn qory bar 275 ınfektsııalyq statsonar jumys istep tur. Bul týraly búgin Úkimet otyrysynda QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.
«Osy jyldyń 6 sáýirindegi jaǵdaıǵa sáıkes, KVI-ge shaldyqqan naýqastarǵa medıtsınalyq kómek kórsetý úshin respýblıkada 28 730 tósek-oryn qory bar 275 ınfektsııalyq statsonar jumyldyrylǵan. Infektsııalyq statsıonarlardyń tolýy 36, reanımatsııalyq statsonarlardyń tolýy 22 paıyzdy quraıdy. Infektsııalyq tósek-orynǵa eń kóp júkteme Batys Qazaqstan, Almaty oblystarynda, Nur-Sultan men Almaty qalalarynda baıqalady», - dedi Alekseı Tsoı.
Onyń atap ótýinshe, Densaýlyq saqtaý mınıstrligi óńirlerdegi árbir medtsınalyq uıymdaǵy tósek-oryn tolymdylyǵyna monıtorıng júrgizýdiń elektrondy júıesin ázirlegen. Bul der ýaqytynda áreket etýge qosymsha statsıonarlar ashýǵa múmkindik beredi.
«Óńirlerde jumys istep turǵan statsıonarlardyń júktemesi 70 paıyzǵa jetken jaǵdaıda ınfektsııalyq tósek-oryndar jasaqtaý jospary bar. Infektsııalyq tósek-oryn rezervi 51 myńnan 60 myńǵa deıin arttyryldy. Rezervtegi nysandar da jumyldyrylatyn bolady. Buǵan qosa, josparly mamandandyrylǵan medıtsınalyq kómek kórsetý de jalǵasa beredi», - dedi mınıstr.
