Koronavırýspen aýyrǵandar psıhıkalyq aýytqýǵa beıim bolady- ǵalymdar
LONDON. QazAqparat – Koronavırýspen aýyryp shyqqandar psıhologııalyq problemalarǵa kóbirek beıim bolady, dep habarlaıdy QazAqparat VVS -ge silteme jasap.
Zertteý nátıjesi boıynsha ǵalymdar osyndaı tujyrymǵa keldi. Onyń negizinde koronavırýsty juqtyrǵandardyń 20% -ynda 90 kún ishinde psıhıkalyq aýytqýlar paıda bolady eken. Koronavırýspen aýyryp shyqqan árbir besinshi adamda belgili bir psıhıkalyq aýytqýlar damıdy, deıdi ǵalymdar, biraq olar nege ekenin áli bilmeıdi.
Oksford ýnıversıtetiniń zertteýshileri Sovid-19-ben aýyryp shyqqan naýqastardy zerttegen. Adamdarda aýrýdan aıyǵyp shyqqannan keıin psıhologııalyq problemalar týyndaǵan, bul eń aldymen mazasyzdyq, depressııa jáne uıqysyzdyq. Sondaı-aq ǵalymdar dementsııanyń (aqyl-oı qabiletteriniń jalpy nasharlaýy) damý qaýpi jáne mıdyń keıbir fýnktsııalarynyń nasharlaýy aıtarlyqtaı artatynyn atap ótti.
«Dárigerler men ǵalymdar mundaı adamdarda psıhologııalyq aýytqýlardyń damýyna ne sebep bolatynyn anyqtap, olardy emdeýdiń jańa tásilderin jasaýy kerek», - dedi psıhıatrııa professory Pol Harrıson.
AQSh-ta zertteýshiler kompıýterlik modeldeýdi qoldana otyryp, eger bılik karantındik shekteýler engizbese jáne adamdar ózin-ózi oqshaýlaý rejımin saqtamasa, barlyq turǵyndardyń 30% aýrý juqtyrady degen qorytyndyǵa keldi.
Zertteý avtorlarynyń aıtýynsha, adamdar kóbinese meıramhanalarda, sport zaldarda, qonaq úılerde jáne kafelerde vırýs juqtyrady, al eger halyq olarǵa barýdan bas tartsa, qysta ınfektsııanyń belsendi túrde taralýyn boldyrmaýǵa bolady.
