Koronavırýspen aýyrǵan jambyldyqtar arnaıy ortalyqta ońaltýdan ótip jatyr

Oblys ákimi Berdibek Saparbaevtyń tapsyrmasyna sáıkes tamyz aıynyń sońynda Ana men bala ortalyǵynda, «Atletık» sport kesheni bazasynda COVID-19 juqtyrǵan eresek turǵyndardy medıtsınalyq ońaltýmen qamtamasyz etetin bólim ashyldy. Ol 120 tósektik ambýlatorııalyq jáne táýliktik statsıonarlyq rejımde jumys jasaıdy.

Ortalyq zamanaýı medıtsınalyq jáne sporttyq jabdyqtarmen qamtylǵan. Munda ońaltýmen aýyqmdy tájirıbesi bar bilikti medıtsınalyq-psıhologııalyq mamandar aınalysady.

Dárigerler koronavırýsten keıingi ońaltý aýrýdyń aýyrlyǵyna qaramastan, emdelgen barlyq adamdar úshin qajet ekenin aıtady

Aýrýdyń klınıkalyq erekshelikterin jáne qosymsha aýrýlardy, onyń ishinde psıhologııalyq faktordy eskere otyryp, jeke kózqaras, keshendilik ortalyqtyń medıtsınalyq ońaltýynyń negizgi qaǵıdattary bolyp tabylady.

Tájirıbeli fızıoterapııa nusqaýshylary ár patsıentke jeke-jeke keýde jáne dene bulshyqet júıesin nyǵaıtý úshin qajetti tynys alý jattyǵýlaryn jasatady.

Drenajdy jaǵdaılarda massajdy qoldaný ókpeniń zaqymdaný deńgeıine baılanysty onyń jeldetilýin, qan aınalymyn jáne qaqyryqty shyǵarýdy jaqsartýǵa kómektesedi. Fızıoterapııalyq emdeý, aerozol terapııasyn qoldaný qabyný protsesiniń tómendeýine jáne syrtqy tynys alý fýnktsııasynyń jaqsarýyna yqpal etedi.

Ońaltý ortalyǵy ashylǵaly bergi az ýaqyttyń ishinde 200-den astam adam qajetti kómek alyp úlgeripti. Olardyń 70 paıyzy áıelder, qalǵan 30 paıyzy er adamdar. Sondaı-aq, ortalyqta 35 medıtsınalyq qyzmetker ońaltý rásiminen ótken. Jas mólsherine keletin bolsaq, emdelýshilerdiń 15 paıyzy 30 men 49 jas aralyǵynda, 50 paıyzy 50 men 69 jas aralyǵynda, al 35 paıyzy 70 pen 80 jas aralyǵyn quraıdy.

Qabyldanǵandardyń 80 paıyzdan astamynda qosymsha aýrýlary bolǵan.

Ońaltý barysynda ár naýqastyń densaýlyǵy jaqsarǵany baıqalady. Barlyǵyna odan ári qalpyna keltirý boıynsha usynystar berilgen.