Koronavırýspen aýyrǵan oraldyq áıel saýyǵyp, úıine shyqty
ORAL. QazAqparat – Koronavırýspen aýyrǵan oraldyq áıel búgin úıine shyǵaryldy. Bul týraly oblystyq juqpaly aýrýlar aýrýhanasynyń dırektory Nadııa Ahmetova málim etti, dep habarlaıdy QazAqparat tilshisi.
Aýrýhana basshysynyń aıtýynsha, naýqastyń jaǵdaıy qanaǵattanarlyq.
«Áıel áli 14 kún úı karantıninde bolady. Oǵan mekenjaıy boıynsha bekitilgen emhana baqylaý jasaıdy. Qalǵan 7 naýqastyń jaǵdaıy turaqty», dedi QazAqparat tilshisine N.Ahmetova.
Budan buryn BQO-da koronavırýs juqtyrǵan áıeldiń Atyraýdan kelgenin jazǵan bolatynbyz. Oral qalasynyń 37 jastaǵy turǵyny qyzmet babymen Atyraýda issaparda bolǵan.
Keıin osy áıelge qatysty jeke málimetterdiń taralýyna baılanysty qylmystyq is qozǵaldy. Qazirgi tańda tergeý amaldary jalǵasýda.
Eske sala keteıik, budan buryn BQO-da koronavırýs juqtyrǵan naýqastyń aýrýhanadan shyǵýǵa daıyndalyp jatqanyn jazǵan bolatynbyz.
Sondaı-aq BQO-da sońǵy tirkelgen eki turǵynnyń Reseıden kelgeni belgili boldy.
