Koronavırýspen aýyrǵan adamnyń densaýlyǵy qansha ýaqytta qalpyna keledi - maman jaýaby

ALMATY. QazAqparat – Almatydaǵy №36 qalalyq emhananyń pýlmonolog-dárigeri, medıtsına ǵylymynyń kandıdaty Dáme Saılanova SOVID-19 ınfektsııasymen aýyrǵandardyń densaýlyǵy týraly aıtyp berdi, dep habarlaıdy QazAqparat tilshisi.

Mamannyń aıtýynsha, Covid-19 aýrýymen aýyrǵan patsıentterdiń densaýlyǵynyń jaǵdaıy ártúrli, aýrýshańdyqty kótere alýyna baılanysty.

«Aýrýdan aıyqqan adamnyń densaýlyǵy bir aıdan bir jylǵa deıingi aralyqta qalpyna keledi. Ókpesi zaqymdanǵan patsıentterde pnevmofıbrıoz týyndaýy múmkin, ıaǵnı rentgenge túsken kezde ol tigis sekildi kórinedi. Koronavırýspen aýyrǵan patsıentterdiń keıbireýinde jalpy álsizdik, tez sharshap qalý, ashýlanshaqtyq, kóńil kúıiniń jıi ózgerýi, uıqysynyń buzýylýy, depressııa mazasyn alady, mundaı kezde emdeý sharasyn júrgizip organızmdi bekitý qajet. Aýyr ótken kovıd pnevmonııasynan keıingi patsıentterdi biz, kórsetkishteri boıynsha, ókpeniń jeldetýin jaqsartý, mazasyzdyq pen depressııanyń aldyn alý, ómir súrýin jaqsartý maqsatynda ońaltý ortalyqtaryna jiberemiz», - deıdi dáriger.

Ońaltýdyń uzaqtylyǵy 14 kúnge deıin sozylady. Ol jerde reabılıtolog dárigerlerdiń baqylaýynda bolady. Depressııa belgisi anyqtalǵan patsıenttermen psıhologtar jumys isteıdi. Sondaı-aq, fızıoterapevtik emsharalar júrgizilip, keýde kletkasyna massaj jasalady.

Ókpesi 50-60% zaqymdanǵan patsıentterdiń ókpe kletkasy jarty jylda qalpyna keledi.

«Aýyr ótken kovıd pnevmonııasynan keıingi qalpyna kelý úrdisi – ońaı ári tez ótetin úrdis emes. Ár adamda qalpyna kelý ýaqyty ártúrli bolady, ol adam aǵzasyna jáne sozylmaly aýrýǵa baılanysty»,-deıdi ol.

Maman koronavırýs ınfektsııasymen aýyrǵan adamdarǵa belsendi qozǵalýǵa, tynys alý gımnastıkasyn jasaýǵa, taza aýada jıi serýendeýge, aqýyzy bar tamaqtardy kóp jeýge keńes berdi.