Koronavırýske shaldyqqan mınıstr Birtanovtyń jaǵdaıy – ortasha

NUR-SULTAN. QazAqparat – Koronavırýs juqtyrǵan mınıstr Densaýlyq saqtaý mınıstri Eljan Birtanovtyń mindetin orynbasary Lázzat Aqtaeva atqarady. Bul týraly vedomstvonyń resmı ókili Dıas Ahmetshárip málim etti, dep habarlaıdy QazAqparat tilshisi.

«Densaýlyq saqtaý mınıstri Eljan Amantaıuly Birtanov koronavırýs ınfektsııasyn juqtyryp, «pnevmonııa» dıagnozymen aýrýhanaǵa jatqyzyldy. Eki kún boldy. Dárigerler onyń densaýlyq jaǵdaıyn ortasha dep baǵalap otyr. Jalpy Eljan Amantaıuly klınıkalyq hattamaǵa saı em-domyn qabyldaýda. Aǵzasy vırýsqa qarsy terapııany jaqsy kóterýde. Emin qabyldaǵannan keıin, jazylyp, óz jumysyna kirisedi degen oıdamyz», - dedi QazAqparat tilshisine telefon arqyly Dıas Ahmetshárip.

Onyń habarlaýynsha, Eljan Birtanov aýrýhanada jumysyn qashyqtan júrgizip, shtab qyzmetin rettep otyr.

Búginnen bastap onyń mindetin ýaqytsha orynbasary Lázzat Aqtaeva atqarady.

Eske sala ketsek, osydan eki kún buryn Densaýlyq saqtaý mınıstri Eljan Birtanov Facebook-paraqshasynda koronavırýs juqtyrǵanyn habarlaǵan edi.

12 maýsymda QR Premer-Mınıstri Asqar Mamın Jambyl oblysyna jumys saparymen baryp qaıtqan. Onda Densaýlyq saqtaý mınıstri E. Birtanov ta bolǵan. Osyǵan baılanysty Úkimet basshysy oqshaýlanýǵa májbúr bolyp otyr.

Áriptesterimen birge Bilim jáne ǵylym mınıstri Ashat Aımaǵambetov, Aýyl sharýashylyǵy mınıstri Saparhan Omarov pen QR Ekologııa, geologııa jáne tabıǵı resýstar mınıstri Maǵzum Myrzaǵalıev óz úılerinde oqshaýlandy.