Koronavırýske baılanysty Brazılııadan AQSh-qa kirýge tyıym salyndy
BRAZILIıA. QazAqparat – Amerıka Qurama Shtattarynyń prezıdenti Donald Tramp Brazılııadan kelgen sheteldikterge AQSh-qa kirýge tyıym saldy. Bul týraly QazAqparat The New York Times basylymyna silteme jasap habarlaıdy.
Latyn Amerıkasy eli koronavırýsty juqtyrý boıynsha álemde ekinshi orynǵa shyqqannan keıin Aqúı osyndaı sheshimge kelgen.
Brazılııa prezıdenti Jaır Bolsonarý vırýsqa qatysty optımıstik kózqaras tanytyp kelgeni belgili. Ol densaýlyq saqtaý salasyndaǵy sarapshylardyń eskertýlerin uzaq ýaqyt boıy elemeı, álemniń kóptegen elinde engizilgen áleýmettik qashyqtyq sharalaryna da nazar aýdarmady.
Qazirgi ýaqytta Brazılııa koronavırýstyń rastalǵan jaǵdaılary boıynsha AQSh-tan keıin ekinshi orynda. Munda 350 myńnan astam adam vırýs juqtyrdy, qaıtys boldy – 22,7 myń naýqas.
«Bul sharalar Brazılııadaǵy sheteldik azamattardyń ınfektsııany elimizge ákelmeýin qamtamasyz etedi», - dep málim etti Aqúıdiń baspasóz hatshysy Keılı Makınanı.
Onyń aıtýynsha, bul jańa shekteýler ekijaqty saýdaǵa áser etpeıdi.
