Koronavırýsqa shaldyqqandardyń 99,9 paıyzy vaktsına almaǵandar – mınıstr

NUR-SULTAN. QazAqparat – Koronavırýsqa shaldyqqandardyń 99,9 paıyzy vaktsına almaǵandar. Bul týraly búgin Úkimet otyrysynda QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

«Búginde 5,9 mln adam 1 komponentpen egildi. Bul ekpe alýǵa tıisti halyqtyń 59 paıyzyn quraıdy. 2 komponentti ekpe alýǵa qajetti halyqtyń 45,2 paıyzy shamamen 4,5 mln adam aldy. Vaktsınatsııanyń 1-dozasymen eń tómengi qamtý protsenti Mańǵystaý oblysynda baıqalady. Óńirler vaktsınanyń jetkilikti kólemimen qamtamasyz etilgen. Vaktsınany jetkizý kestege sáıkes júrgizilip jatyr. Vaktsınatsııanyń tıimdiligin baǵalaý barysynda aýrýdyń 99,9 paıyzy vaktsına almaǵandarǵa tıesili ekendigi anyqtaldy. Bul rette vaktsınatsııadan keıin aýyrǵandardyń úlesi ne bári 0,1 paıyzdy quraıdy», - dedi Alekseı Tsoı.

Mınıstrdiń dereginshe, ekpe almaǵandar arasynda COVID-19-dan ólim-jitim úlesi 97,7 paıyzdy quraıdy. Al vaktsınatsııa alǵandar arasynda qaıtys bolǵandar 2,3 paıyzdy qurap otyr. Bul rette olardyń aýyr sozylmaly aýrýlary bolǵan.

«Bul fakti COVID-tiń aýyr saldarynyń aldyn alýdaǵy vaktsınatsııanyń tıimdiligin taǵy bir márte dáleldeıdi», - dedi ol.